جێگری فەرماندەی بارەگای ناوەندیی خاتەمەلئەنبیای ئێران ڕایدەگەیەنێت، وڵاتەکەی کێشەی لەگەڵ جەنگدا نییە و چاوەڕێی ڕووداوەکان دەکات، ئاشکراشی دەکات کە هێشتا هەموو کارتە براوەکانیان بەکارنەهێناوە و تەنانەت ئەگەر ناتۆش بێتە ناو گۆڕەپانەکەوە هیچ نیگەرانییەکیان نییە.

سەردار محەممەد جەعفەر ئەسەدی، جێگری فەرماندەی بارەگای ناوەندیی خاتەمەلئەنبیای ئێران لە لێدوانێکدا ڕایگەیاند: "چەندین جار جەختمان کردووەتەوە کە هێشتا هەموو کارتە براوەکانی خۆمان ئاشکرا نەکردووە و چەندین کارتی دیکەمان بەدەستەوەیە کە ئەگەر پێویست بکات بەکاریان دەهێنین".

 ئاماژەی بەوەش کرد کە ئەو شوێنانەی ئێستا بۆ بەرهەمهێنانی کەرەستەی سەربازی و پاڵپشتیکردنی هێزە چەکدارەکانیان بەکاریان دەهێنن، بەتەواوی لە چاوی دوژمن شاراوەن و هیچ زانیارییەکیان لەسەر شوێنەکانیان نییە.

لە بەشێکی دیکەی قسەکانیدا، ئەو بەرپرسە باڵایەی ئێران ڕەتیکردەوە وڵاتەکەی پێویستی بە چەکی ئەتۆمی هەبێت و وتی: "چەکی باڵا و بۆمبی ئەتۆمی ئێمە گەلەکەمانە".

هەروەها جەختی لەوە کردەوە کە ئەوان تەسلیم بە ئەمریکا نابن و ڕایگەیاند: "تەنانەت ئەگەر هیچ شتێکیشمان نەبێت، بە بەرد دەچینە جەنگی ئەمریکاوە، چونکە ئێمە چاوەڕێین و کێشەمان لەگەڵ جەنگدا نییە و ئەگەر ناتۆش بێتە ناو گۆڕەپانەکەوە ئامادەین".