عەلیڕەزا سەلیمی، ئەندامی دەستەی سەرۆکایەتیی پەرلەمانی ئێران ڕایگەیاند، بەمزووانە پڕۆژەیاسای سەپاندنی بەڕێوەبردن و سەروەریی ئێران بەسەر گەرووی هورمزدا لە پەرلەمان پەسەند دەکرێت و دەبێتە یاسا، جەختیشیکردەوە کە ئەو پرسە بۆ کۆماری ئیسلامیی ئێران لە دەیان بۆمبی ئەتۆمی گرنگترە و بە هیچ شێوەیەک جێگەی مامەڵەپێوەکردن نییە.

سەلیمی لە لێدوانێکدا ئاماژەی بەوە کرد، هەڵسەنگاندنی ورد بۆ پڕۆژەیاساکە کراوە و بۆچوونی لایەنە جیاوازەکانی وەک کەرتەکانی ئابووری، گواستنەوە، ئەمنی و دامەزراوە پەیوەندیدارەکانی تر وەرگیراوە، هەروەها ئاشکرایکرد کە لایەنی عومانیش ڕەزامەندیی سەرەتایی خۆی لەسەر ئەو پرسە دەربڕیوە.

ئەندامەکەی دەستەی سەرۆکایەتیی پەرلەمانی ئێران وەڵامی لێدوانەکانی ئەمریکاشی دایەوە و وتی: "ئەوەی ترەمپ و کەسانی تر دەڵێن کە دەبێت گەرووی هورمز بکرێتەوە، پەیوەندیی بە ئێمەوە هەیە و ڕێگە نادەین ئەوان بڕیار لەسەر ئەو بابەتە بدەن، بەڵکو بەڕێوەبردنی گەرووەکە بەتەواوی و خاڵ بە خاڵ لە پەرلەمانەوە دەکەین بە یاسا و یەکلایی دەکرێتەوە".

ئەمە لەکاتێکدایە، تا ئێستا ڕوون نییە پڕۆژەیاساکە چەند واژۆی کۆکردووەتەوە و کەی دەخرێتە دەنگدانەوە، بەتایبەت کە لە دوای هێرشەکانی ئەمریکا و ئیسرائیلەوە بۆ سەر ئێران، دانیشتنە ئاشکراکانی پەرلەمانی ئێران لە شوێنی هەمیشەیی خۆی ڕاگیراوە.

لە ئێستاشدا گەرووی هورمز کە دەکەوێتە نێوان ئاوەکانی ئێران و عومانەوە، بەهۆی ململانێکانی دواییەوە لەلایەن ئێرانەوە کۆنتڕۆڵ کراوە و هاتوچۆی کەشتییەکان تێیدا بەشێوەیەکی بەرچاو کەمبووەتەوە.

لە بەرامبەریشدا ئەمریکا جەخت لە کردنەوەی گەرووەکە دەکاتەوە و ڕێکخراوی کەشتیوانیی سەر بە نەتەوە یەکگرتووەکانیش بیرۆکەی وەرگرتنی باجی پەڕینەوە لەو گەرووە ڕەتدەکاتەوە.