واشنتۆن ئامادەیە هێرشەکانی بۆ سەر ئێران دەستپێبکاتەوە ئەگەر لایەنەکان نەگەنە ڕێککەوتن؛ ئەمەش لە کاتێکدایە دانوستانکارانی ئەمریکا و ئێران کار بۆ کەمکردنەوەی ئەو جیاوازییە گەورە و سەرەکییانە دەکەن کە بوونەتە ڕێگر لەبەردەم گەیشتن بە لێکتێگەیشتنێکی کۆتایی.

پیت هێگسێت، وەزیری بەرگریی ئەمریکا، ئەمڕۆ شەممە لە سینگاپوور ڕایگەیاند: "توانای ئێمە بۆ دەستپێکردنەوەی هێرشەکان لە کاتی پێویستدا ڕوونە و ئێمە لەوەش زیاتر توانامان هەیە."

وەزیری بەرگریی ئەمریکا لە درێژەی قسەکانیدا ئاماژەی بەوەش کرد: "کۆگاکانی چەک و تەقەمەنیمان بە تەواوی بۆ ئەم مەبەستە گونجاون، چ لە ناوچەکەدا و چ لە سەرانسەری جیهاندا، بۆیە ئێمە لە دۆخێکی زۆر باشدان."