جۆناسان پۆلارد، سیخوڕی پێشووی ئیسرائیلی-ئەمریکی، بە لێدوانەکانی سەبارەت بە ئەگەری هەڵگیرسانی جەنگ لە نێوان ئیسرائیل و هەریەک لە تورکیا و میسر دوای کۆتاییهاتنی ململانێکانی ئێستای غەززە و لوبنان، مشتومڕێکی بەرفراوانی دروستکرد.

لە لێدوانێکیدا کە ماڵپەڕی (Israel National News) بڵاویکردووەتەوە، پۆلارد ڕایگەیاندووە: "گەردەلوولێک بەڕێوەیە کە جیهان پێشتر هاوشێوەی نەبینیوە"، و ئاماژەی بەوەشکردووە کە ئیسرائیل "بە ئەگەری زۆرەوە ناچار دەبێت جەنگی داهاتووی دژی تورکیا و میسر بکات". هاوکات ئاماژەی بەوەشکردووە کە ئیسرائیل ڕووبەڕووی ئاڵەنگارییە هەرێمییەکان دەبێتەوە و پێشهاتەکانی ئێستای ناوچەکە دەرگا بەڕووی پێکدادانی فراوانتردا دەکەنەوە.

لە بەشێکی دیکەی قسەکانیدا، ئەو سیخوڕەی پێشووی ئیسرائیل، دان بە پاشکۆیەتی وڵاتەکەی بۆ ئەمریکا دەنێت و دەڵێت: "ئێمە دەوڵەتێکی سەربەخۆ نین وەک ئەوەی سەرکردەکانمان بانگەشەی بۆ دەکەن، بەڵکو تەنها هێزێکی یارمەتیدەری سەر بە ویلایەتە یەکگرتووەکانی ئەمریکاین و لە بازنەی ئەواندا دەجوڵێین."

جێی باسە، جۆناسان پۆلارد یەکێکە لە دیارترین دۆسیەکانی سیخوڕی لە مێژووی پەیوەندییەکانی ئەمریکا و ئیسرائیلدا. پێش دەستگیرکردنی لە ساڵی 1985 بە تۆمەتی دزەپێکردنی بەڵگەنامەی نهێنی بۆ ئیسرائیل، وەک شیکەرەوەی هەواڵگری لە هێزی دەریایی ئەمریکا کاری کردووە. دوای بەسەربردنی نزیکەی 30 ساڵ زیندانیکردن لە ئەمریکادا، ئازادکرا و دواتر گەڕایەوە ئیسرائیل.