سوپای پاسدارانی ئێران، ئەمڕۆ پێنجشەممە، ڕایگەیاند لە وەڵامی هێرشێکی بەرەبەیانی ئەمڕۆی سوپای ئەمریکا بۆ سەر ناوچەیەک لە نزیک فڕۆکەخانەی بەندەرعەباس، بنکەیەکی ئاسمانیی ئەمریکییان کردووەتە ئامانج و هۆشداریش دەدات کە هەر جۆرە هێرشێکی دیکە وەڵامی توندتری دەبێت.

لە ڕاگەیەندراوێکدا، پەیوەندییە گشتییەکانی سوپای پاسدارانی ئێران بڵاویکردەوە: "دوای ئەوەی بەرەبەیانی ئەمڕۆ سوپای ئەمریکا لەڕێگەی هێرشی ئاسمانییەوە ناوچەیەکی لە دەوروبەری فڕۆکەخانەی بەندەرعەباس کردە ئامانج، لە کاتژمێر 4:50 خولەکدا ئەو بنکە ئاسمانییەی ئەمریکا کە هێرشەکەی لێوە ئەنجامدرابوو، کرایە ئامانج."

سوپای پاسداران جەختی لەوەش کردووەتەوە کە ئەم وەڵامە هۆشدارییەکی جددییە بۆ ئەوەی دوژمن بزانێت هیچ هێرشێک بێ وەڵام نامێنێتەوە، و ئاماژەی بەوەشکردووە: "لە ئەگەری دووبارەبوونەوەیدا، وەڵامەکەمان یەکلاکەرەوەتر دەبێت و بەرپرسیارێتی و دەرئەنجامەکانیشی لە ئەستۆی لایەنی هێرشبەرە."