سەرۆکانی چین و ڕووسیا ڕایانگەیاند، پەیوەندییەکانی نێوانیان گەیشتووەتە ئاستێکی مێژوویی و بێپێشینە و بەردەوامە لە گەشەسەندن، هاوکات جەختیان لە کارکردن بۆ بنیاتنانی سیستەمێکی جیهانیی فرەجەمسەر و ڕووبەڕووبوونەوەی هەژموونی تاکلایەنە کردەوە.

شی جینپینگ، سەرۆکی چین، ئاماژەی بەوە کرد کە لەگەڵ ڤلادیمێر پوتینی هاوتا ڕووسییەکەی گفتوگۆی ستراتیژییان ئەنجامداوە و ئامانجیانە سیستەمێکی جیهانیی دادپەروەرتر و ژیرانەتر دابمەزرێنن. هۆشداریشیدا لەوەی جیهانی ئەمڕۆ بەهۆی ڕەفتارە تاکلایەنەکان و هەوڵەکانی سەپاندنی هەژموونەوە سەقامگیریی لەدەستداوە.

هەروەها داوای لە مۆسکۆ کرد بەشداری لە دەستپێشخەریی "کۆمەڵگەی یەکگرتوو بۆ بەرژەوەندیی مرۆڤایەتی" بکات، بە مەبەستی بەهێزکردنی متمانەی سیاسی و فراوانکردنی هاوکارییەکانیان لە بوارەکانی پەروەردە و گەشەپێدانی نیشتمانی.

لە بەرامبەردا، ڤلادیمێر پوتین، سەرۆکی ڕووسیا ئاشکرایکرد، سەرجەم مامەڵە بازرگانییەکانی نێوان هەردوو وڵات لە ئێستادا بە دراوی ناوخۆیی ئەنجام دەدرێن. دووپاتیشیکردەوە کە مۆسکۆ بەشێوەیەکی جێگیر و بێ پچڕان بەردەوام دەبێت لە هەناردەکردنی وزە بۆ بازاڕەکانی چین، لەگەڵ بەهێزکردنی هاوبەشییەکانیان لە بواری کانزا ستراتیژییەکان.

 پوتین جەختی لەوەش کردەوە کە هەردوو وڵات پابەندن بە سیاسەتێکی دەرەوەی سەربەخۆ و خاوەن سەروەری، و پێکەوە کاردەکەن بۆ پاراستنی یاسا نێودەوڵەتییەکان و سەقامگیریی جیهانی.