فەرماندەی بڕیارگەی ناوەندیی خاتەمولئەنبیا هۆشداری دەداتە ئەمریکا و هاوپەیمانەکانی کە دووبارە هەڵەی ستراتیژی و هەڵەی لێکدانەوە نەکەن و ڕایدەگەیەنێت، هێزە چەکدارەکانی ئێران دەستیان لەسەر پیتەیە بۆ وەڵامدانەوەی هەر جۆرە دەستدرێژییەک.

عەلی عەبدوڵڵاهی، فەرماندەی بڕیارگەی ناوەندیی خاتەمولئەنبیا، لە لێدوانێکدا ڕایگەیاند: "پێویستە ئەمریکا و هاوپەیمانەکانی بزانن کە ئێرانی ئیسلامی و هێزە چەکدارەکانی لە جاران ئامادەتر و بەهێزترن و دەستیان لەسەر پەلەپیتکەیە، هەروەها وەڵامێکی خێرا، یەکلاکەرەوە، بەهێز و بەرفراوانیان دەبێت بۆ هەر دەستدرێژی و هێرشێکی نوێی دوژمنان بۆ سەر خاکی وڵات و گەلەکەمان".

ئاماژەی بەوەشکردووە، دوژمنانی ئەمریکی و زایۆنیستی چەندین جار گەلی ئێران و هێزە چەکدارە بەتواناکانیان تاقیکردووەتەوە.

ئەو فەرماندە سەربازییەی ئێران جەختی لەوەش کردەوە، لە گۆڕەپانی کرداردا هێز و توانای خۆیان بە دوژمنان نیشان دەدەن و وتیشی: "ئەگەر هەڵەیەکی دیکە لەلایەن دوژمنەکانمانەوە ڕووبدات، ئەوا بە هێز و توانایەکی زۆر زیاتر لە جەنگی سەپێنراوی ڕەمەزان ڕووبەڕوویان دەبینەوە، بە هەموو توانایەکمانەوە بەرگری لە مافەکانی گەلی ئێران دەکەین و دەستی هەر دەستدرێژیکارێک دەبڕین".