رۆژنامەیەکی ئەمریکی ئاشکرای دەکات رووسیا لە رێگەی دەریای قەزوینەوە چەک و پێداویستی دیکە دەگەیەنێتە ئێران و بەم جۆرەش کاریگەری گەمارۆ دەریاییەکەی سەر ئەو وڵاتە کەمبووەتەوە.

ڕۆژنامەی نیویۆرک تایمزی ئەمریکی لە زاری بەرپرسانی وڵاتەکەیەوە بڵاویکردەوە، ڕووسیا لە ڕێگەی دەریای قەزوینەوە پارچە و پێکهاتەی فڕۆکەی بێفڕۆکەوان (درۆن) هەناردەی ئێران دەکات، ئەمەش هاوکاریی ئەو وڵاتە دەکات بۆ دووبارە بونیادنانەوەی توانا سەربازییەکانی.

ڕۆژنامەکە ئاماژەی بەوەش کردووە، مۆسکۆ لە ئێستادا ئەو کاڵا و پێداویستییانە بۆ تاران دابین دەکات کە بەپێی نەریتەکان پێشتر لە ڕێگەی گەرووی هورمزەوە تێدەپەڕین و هاوردە دەکران.

هاوکات پشت بەستن بە داتاکانی بازرگانیی ڕووسیا، نیویۆرک تایمز ڕوونیکردووەتەوە کە لە چەند مانگی ڕابردوودا جووڵەی بارکردن و گواستنەوەی کەشتییەکان لە دەریای قەزوینەوە بۆ ئێران بە شێوەیەکی بەرچاو زیادیکردووە.