بە وتەی وەزیری کشتوکاڵ و سەرچاوەکانی ئاوی هەرێم، لەسەرجەم ناوچەکان نزیکەی 20 بەنداوی بچووک و مامناوەن پڕ و سەرڕێژ بوون.

بێگەر تاڵەبانی رایگەیاند: بە پێی پلانی زانستی وەزارەتمان و لە ڕێی بەڕێوەبەرایەتی گشتی بەنداو و کۆگاکانی ئاو، بەشەونخوونی بەڕێوەبەری گشتی و بەرێوەبەر و کارمەندانمان لە سەر پڕۆژەکان توانرا لە سەرەتایی وەرزی بارانەوە، سوود لە باران و داهاتی ئاوی ئەمساڵ وەربگیرێ و ڕێژەیەکی زۆر باش ئاو کۆ بکرێتەوە و هاوکات سەلامەتی بەنداوەکان بپارێزرێ.

وەزیری کشتوکاڵ و سەرچاوەکانی ئاوی هەرێمی کوردستان روونیشی کردووەتەوە: 20  بەنداوی بچووک و مامناوەند بەتەواوی پڕبوون و سەرڕێژ بوون لە تەواوی دەڤەرەکانی هەرێمی کوردستان.

بەنداوی دەربەندیخان 2.3 ملیار مەتر سێجا ئاوی تێدا کۆکراوەتەوە و بە پێی پلانێکی زانستی هەنگاو بە هەنگاو پڕ دەکرێ.

بەنداوی دوکان 3.7 ملیار م3 ئاوی کۆکردۆتەوە و ڕۆژانە بەڕێژەیەکی باش زیاد دەکات و پلانی کۆکردنەوەی زۆرترین بڕی ئاومان لە کۆتای وەرزدا هەیە.

بەنداوی دهۆک ڕێژەیەکی باش ئاوی زیادی کردووە و نزیکە لە پڕبوون و 47 ملیۆن م3 ئاوی تێدایە.

بەنداوی گۆمەسپان بڕی 20 ملیۆن م3 ئاوی خەزنکردووە کە 60% ئاوی کۆکراوەی ئەمساڵە و بەردەوامە لە زیادبوون.