بە وتەی شارەزایەکی کەشناسی، شەپۆلێکی باران و تەرزە بەڕێوەیە و ماوەی دوو رۆژ بەردەوام دەبێت و بڕی بارانبارینی پێشبینی کراو لە هەندێک ناوچە دەگاتە 50 ملم لەماوەی ئەو دوو رۆژەدا.

ئاراس جەبار شارەزای کەشناسی رایگەیاند: سبەی سێ شەممە 24/3/2026 لە کاتەکانی دوانیوەڕۆوە شەپۆلی هەورەبروسکە، بارانی بەخوڕ و تەرزە ناوچەکانی سنووری گەرمیان، کەرکوک، سلێمانی و هەڵەبجە بگرێتەوە و پلەکانی گەرما 2 بۆ 3 پلە دادەبەزن.

باسی لەوەشکرد: بۆ رۆژی چوارشەممە شەپۆلەکە فراوانتر دەبێت و بارانی باش و مامناوەندی پچڕپچڕ سەرجەم  ناوچەکانی پارێزگای دهۆک، هەولێر و ئیدارەی سۆران و راپەڕینیش دەگرێتەوە.

ئەوەشی خستەڕوو: کاریگەری ئەم شەپۆلە لە ئێوارەی رۆژی چوارشەممە بەرەو لاوازی دەچێت.

بڕی بارانی پێشبینیکراو لەماوەی هەردوو رۆژی سێشەممە و چوارشەممە:

سنووری پارێزگای سلێمانی 30 - 50 ملم

سنووری پارێزگای هەڵەبجە 20 - 30 ملم

سنووری پارێزگای کەرکوک 20 - 30 ملم

سنووری ئیدارەی گەرمیان 30 - 40 ملم

سنووری پارێزگای هەولێر 10 - 20 ملم

سنووری پارێزگای دهۆک 5 - 10 ملم

سنووری ئیدارەی سۆران و راپەرین 15 - 25 ملم