بانکی ناوەندی عێراق ڕێنماییەکی نوێی ئاراستەی سەرجەم بانک و دامەزراوە داراییەکان کرد و تێیدا جەخت دەکاتەوە کە دەبێت کۆتایی بە دیاردەی جیاکاری لە نێوان چاپە جیاوازەکانی دۆلاری ئەمریکی بهێنرێت.



لە گشتاندنێکدا کە ئەمڕۆ دووشەممە، ١٦ی شوباتی ٢٠٢٦ بڵاوکراوەتەوە، بانکی ناوەندی ڕایگەیاند: پێویستە هەموو بانکەکان و نوسینگەکانی ئاڵوگۆڕی دراو پابەندی ڕێنماییەکان بن و هیچ جیاوازییەک لە نرخ یان وەرگرتنی دۆلاری چاپی کۆن و نوێ (کە لە ناوخۆدا بە دۆلاری سپی و شین ناسراون) نەکەن.



ئاماژە بەوەکراوە، کە نابێت بە هیچ شێوەیەک نرخی دۆلاری چاپی کۆن لە چاپی نوێ کەمتر بێت و دەڵێت: بانکی ناوەندی بەردەوامە لە وەرگرتنی هەموو جۆرە چاپەکان لە بانکەکان، بەو مەرجەی تەنها مەرجە نێودەوڵەتییەکانی تێدابێت و ساختە نەبێت.



بانکی ناوەندی ئاماژەی بەوەش کردووە، کە ئەم هەنگاوە بۆ پاراستنی مافی هاووڵاتییان و ڕێگریکردنە لە شێواندنی بازاڕی دراو و جگە لەوەش لە ڕووی یاسایی و داراییەوە هیچ جیاوازییەک لە نێوان چاپە جیاوازەکانی دۆلاردا نییە و هەر بانکێک یان کۆمپانیایەک پابەند نەبێت، ڕووبەڕووی سزای یاسایی دەبێتەوە.



ئەم بڕیارەی بانکی ناوەندی دوای ئەوە دێت کە لە بازاڕەکاندا بەهۆی جیاوازی ساڵی دەرچوونی تێبینییەکانی دۆلار، هاووڵاتییان ڕووبەڕووی کێشە و کەمکردنەوەی نرخ دەبوونەوە.