مامۆستایان و فەرمانبەرانی ناڕازی هۆشداریی دەدەنە حکومەت   

ئەنجومەنی سەرتاسەریی مامۆستایان و فەرمانبەرانی ناڕازی، لە ڕاگەیەندراوێکدا هێرش دەکەنە سەر دەسەڵاتدارانی هەرێمی کوردستان و ڕایدەگەیەنن کە سەرەڕای بڕیارەکانی دادگای فیدراڵی و ڕێککەوتنە نەوتییەکان، کێشەی مووچەخۆران نەک چارەسەر نەکراوە، بەڵکو قووڵتر بووەتەوە.
لە ڕاگەیەندراوەکەدا کە ئەمڕۆ سێشەممە (٣ی شوباتی ٢٠٢٦) بڵاوکراوەتەوە، ئەنجومەنەکە دەسەڵات بە "بێباک و بەرپرسیار لە قەیرانەکان" وەسف دەکات و پێنج داواکاریی سەرەکی بۆ ئاساییکردنەوەی دۆخی مووچەخۆران دەخاتە ڕوو:
١. ڕەتکردنەوەی "هەژماری من": پێویستە بڕیاری ڕاگرتنی مووچەی ئەو مامۆستا و فەرمانبەرانەی بەشدارییان لە پڕۆژەی (هەژماری من) نەکردووە، بەزووترین کات هەڵبووەشێتەوە.
٢. دەستپێکردنەوەی پلەبەرزکردنەوە: دەستبەجێ پلەبەرزکردنەوەی مامۆستایان و فەرمانبەرانی شارستانی دەستپێبکاتەوە کە چەندین ساڵە ڕاگیراوە.
٣. چارەنووسی مووچە فەوتاوەکان: یەکلاییکردنەوەی چارەنووسی مووچەی مانگەکانی (١١ و ١٢)ی ساڵی ڕابردو یەکلابکرێتەوە   
٤. دامەزراندنی گرێبەستەکان: بەهەمیشەییکردنی مامۆستایان و فەرمانبەرانی گرێبەست لە تەواوی دامودەزگاکانی حکومەتدا.
٥. پشتیوانی ناڕەزایەتییەکان: بەردەوامی و پشتیوانیکردنی هەموو هەڵوێستێکی مەدەنی بۆ ڕەتکردنەوەی سیاسەتی برسیکردن.
لە کۆتایی ڕاگەیەندراوەکەدا، ئەنجومەنی سەرتاسەریی مامۆستایان و فەرمانبەرانی ناڕازی هۆشداری دەداتە حکومەت و ڕایدەگەیەنێت: "ئەگەر داواکارییەکانمان جێبەجێ نەکرێن، ئامادەکاری دەکەین بۆ هەڵوێستی توند و سەرتاسەریی لە هەموو هەرێمی کوردستاندا." جەختیشیان کردووەتەوە کە چیتر لە ئاست "مووچەبڕین و دزینی شایستە داراییەکانیان" بێدەنگ نابن