ڕوانگەی سوری بۆ مافەکانی مرۆڤ  ناوەرۆکی نوێترین ڕیکەوتنی نێوان هەسەدەو دیمەشقی بڵاو کردەوەو رایدەگەیەنێت بەم زوانە بە فەرمی دەقی راگەیەندراوەکە بلاو دەکرێتەوە 

هەواڵ:  KNN

 بە پێی بڵاو کراوەی ڕوانگەی سوری ئەم ڕێککەوتنە گۆڕانکاری بنەڕەتی لە نەخشەی سەربازی، ئەمنی و ئیداری ناوچەکانی باکوور و ڕۆژهەڵاتی سووریا (ناوچە کوردییەکان) دەهێنێتە کایەوە.
بەپێی زانیارییەکان ، ڕێککەوتنەکە چەند هەنگاوێکی سەربازیی هەستیار لەخۆ دەگرێت، لەوانە:

  کشانەوەی هێزەکانی حکومەتی کاتی سوریا  لە شاری "شەدادی" و نەچوونی سوپای سووریا بۆ ناوچە کوردییەکان؛ لە بەرامبەردا هێزەکان دەگەڕێنەوە ناو بنکە و سەربازگەکانی پێشویان.

"هەسەدە" لیستێکی 20  بۆ 25  هەزار شەڕڤانی ئامادە کردووە بۆ ئەوەی لە چوارچێوەی دوو "لیوا"ی تایبەتدا ببنە بەشێک لە وەزارەتی بەرگری سووریا، بە مەرجێک تایبەتمەندی و پێکهاتەی ڕێکخراوەیی هەسەدە ڕەچاو بکرێت.

لە ڕووی ئەمنییەوە، ئەرکی پاراستنی ناوخۆی ناوچە کوردییەکان بە هێزەکانی "ئاساییش" دەسپێردرێت. سەبارەت بە سەروەریی سنوورەکان، بڕیاردراوە دەروازە سنوورییەکان (بە تایبەت دەروازەی سێمالکا)، فڕۆکەخانەکان و هێڵە سنوورییەکان بە هاوبەشی لە نێوان هەردوولادا بەڕێوەببرێن.

ڕێککەوتنەکە لایەنێکی ئیداریی گرنگیشی هەیە، کە بریتین لە:

دیاریکردنی پارێزگار و بەرپرسانی باڵا لە وەزارەتەکاندا لەو کەسایەتییانەی کە "بەڕێوەبەریی خۆسەر" پێشنیازیان دەکات.

پێکهێنانی ئەنجومەنی خۆجێی لە خەڵکی ڕەسەنی ناوچەکانی (سەری کانیێ و عەفرین) بۆ بەڕێوەبردنی کاروباری خزمەتگوزاری و کارگێڕی، وەک هەنگاوێک بۆ ئاساییکردنەوەی دۆخی ئەو ناوچانە.

ئەم لێکتێگەیشتنە نوێیەی نێوان هەسەدە و حکومەتی نوێ، دوای شەڕو ئاڵۆزیەکانی  ئەم دواییە دێت  ئەوەش کارادنەوەی زۆری ناوخۆیی دەرەکی لێکەوتەوەو  بووە هۆی کردنەوەی دەرگای گفتوگۆ بۆ ڕێگریکردن لە پێکدادانی زیاتر و گەیشتن بە چارەسەرێکی سیاسی کە بەرژەوەندی هەردوولای تێدا بێت