زۆر کەس له‌وبڕوایه‌دان کە خەوی ئارام لە مێشکەوە دەست پێدەکات، بەڵام لە ڕاستیدا لە بەشێکی خوارەوەی جەستە دەستپێدەکات کە بریتییە لە ڕیخۆڵە.

هەواڵ:KNNC

 ماڵپەڕی ساینس ئەلێرت له‌راپۆرتێكیدا بڵاویكردوه‌ته‌وه‌؛ گردبونه‌وه‌ی تریلیۆن میکرۆب کە لە کۆئەندامی هەرسدا دەژین، کە بە مایکرۆبایۆمی ڕیخۆڵە ناسراوە، ڕۆڵێکی گرنگ دەگێڕێت لە ڕێکخستنی کوالیتی خەو و باری دەروونی و تەندروستی گشتی.

کاتێک مایکرۆبایۆمی ڕیخۆڵە هاوسەنگ و تەندروست بێت، خەوتن زیاتر باشتر دەبێت و کاتێکیش تێکدەچێت، زۆرجار کەمخەوی و تێکچوونی خەو و سوڕی خراپی خەو ڕوودەدات.

ڕیخۆڵە و مێشک بە بەردەوامی په‌یوه‌ندییه‌كی راسته‌وخۆیان پێكه‌وه‌ هه‌یه‌. ئەم تۆڕە پەیوەندییە دەمارەکان و هۆرمۆنەکان و سیگناڵەکانی بەرگری لەش لەخۆدەگرێت. ناسراوترین بەشی ئەم سیستەمە دەماری ڤاگۆسە کە وەک هێڵی پەیوەندی دوولایەنە کاردەکات و زانیاری لە نێوان ڕیخۆڵە و مێشکدا دەگوازێتەوە.

توێژەران هێشتا لێکۆڵینەوە لە ڕۆڵی دەماری ڤاگۆس(په‌نهان) دەکەن لە خەودا، بەڵام بەڵگەکان ئەوە دەردەخەن کە زیادبوونی چالاکییەکانی دەماری ڤاگۆس پاڵپشتی سیستەمی دەماری ئارام و لێدانی رێك و پێكی دڵ و پشوودان دەکات. بەهۆی ئەم پەیوەندییە نزیکەوە گۆڕانکاری لە ڕیخۆڵەدا کاریگەری لەسەر چۆنیەتی ڕێکخستنی مێشک و باری دەروونی و خەو هەیە.