هەسەدە رایدەگەیەنێت، هێزە چەکدارەکانی سەر بە حکومەتی دیمەشق، هەوڵیانداوە دزەبکەنە ناو یەکێک لە پێگەکانیان، لە سنوریی بەنداوی تشرین و دوای روبەڕوبونەوەیان هەڵهاتون و لەئەنجامدا کوژراوێکیان لێ بەجێماوە.

هەواڵ:KNNC

ئەمڕۆ پێنجشەممە، ناوەندی راگەیاندنی هەسەدە ڕاگەیەندراوێکی بڵاوکردوەتەوە و تێیدا هاتوە؛ سەرلەبەیانی ئەمڕۆ گروپێک لە چەکدارانی حکومەتی دیمەشق هەوڵیاندا دزە بکەنە ناو یەکێک لە پێگەکانی هێزەکانیان لە لادێکانی بەنداوی تشرین، بە بەکارهێنانی نارنجۆکی دەستی ئەندامەکانیان بکەنە ئامانج و ئارامی ناوچەکە تێکبدەن.

ئاماژەیان بەوەشکردوە؛ هێزەکانیان دەستبەجێ بەرپەرچیان داونەتەوە و  هێرشیان کردوەتەوە سەر گروپە  چەکدارەکە و لە نێوانیاندا پێکدادانی راستەوخۆ رویداوە.

وەک لە راگەیەندراوەکەدا هاتوە؛ یەکێک لە گروپە چەکدارەکەی سەر بە حکومەوتی دیمەشق کوژراوە و ئەوانی دیکەش هەڵاتون.

هەسەدە جەختیش دەکاتەوە لەوەی هێزەکانیان بۆ وەڵامدانەوەی هەڕەشە و پوچەڵکردنەوەی هەوڵی دزەکردنی هێزە چەکدارەکانی سەر بە دیمەشق، بە مافی ڕەوای خۆیان دەزانن بەرگری بکەن و بەرپەرچیان بدەنەوە.