كۆمسیۆنی باڵای سەربەخۆی هەڵبژاردنەكان پاكێجێكی تایبەت بە ڕێكارەكانی بەرەنگاربوونەوەی گوتاری توندڕەوی خستەڕوو.

هەواڵ:KNNC

ئەمڕۆ چوارشەممە، عومەر ئەحمەد سەرۆكی ئەنجومەنی كۆمیساریای كۆمسیۆنی باڵای سەربەخۆی هەڵبژاردنەكان ڕایگەیاند:

ڕوبەڕوبونەوەی گوتاری توندڕەوی پێویستی بە پاكێجێكی گشتگیر هەیە لە ڕێكارەكان، لەوانە:

بەهێزكردنی چوارچێوە یاساییەكان كە گوتاری ڕقاوی و هاندان بۆ توندوتیژی بە تاوان دەزانن، لە هەمانكاتدا دەستەبەركردنی ڕێزگرتن لە ئازادی بیروڕا و ڕادەربڕین لە سنووری یاسادا.

هۆشیاركردنەوەی دەنگدەران و كاندیدەكان و پیشەگەرەكانی ڕاگەیاندن سەبارەت بە گرنگی گوتاری بەرپرسیارانە، و پەسەندكردنی ڕێسای ڕەفتاری هەڵبژاردن كە هەموو لایەنەكان پابەند دەكات بە ڕێزگرتن لە ڕێساكانی كێبڕكێی دادپەروەرانە.

چاودێریكردنی بانگەشەی هەڵبژاردن و سۆشیال میدیا بۆ دەستنیشانكردنی پێشێلكارییەكان و چارەسەركردنیان بە خێرایی و شەفافانە.

هاوكاریكردن لەگەڵ دەزگا ئەمنییەكان بۆ دەستەبەركردنی پاراستنی بنكەكانی دەنگدان و سەلامەتی دەنگدەران و كاندیدەكان بە هەمان شێوە.

سەرۆكی دەستەی كۆمسیاران دووپاتیشیكردەوە: كۆمسیۆنی باڵای سەربەخۆی هەڵبژاردنەكان ئامادەیە بۆ ئەنجامدانی پرۆسەی هەڵبژاردن لە وادەی دیاریكراودا، و لە دوورییەكی یەكسان لە هەموو لیست و كاندیدە ڕكابەرەكان وەستاوەو دەرگاكانی كراوەیە بۆ وەرگرتنی سەرنجەكانیان و وەڵامدانەوەی پرسیارەكانیان، ئامانجیشی بەدیهێنانی دادپەروەری هەڵبژاردنە.