بەشێک لە سیاسییەکانی عێڕاق ترسیان لە کشانەوەی ئەمەریکا هەیە و پێیان وایە ئاماژەیەکە بۆ دروستبونەوەی شەڕ لە نێوان ئێران و ئیسرائیل.

هەواڵ: KNNC

لە شەوی دوشەممەوە جوڵەی هێزەکانی ئەمەریکا لە بنکەی سەربازیی عەین ئەسەدەوە بۆ بنکەی سەربازیی هەریر لە هەرێمی کوردستان دەستیپێکردوە، بەپێی راپۆرتێکی رۆژنامەی شەرقولئەوەست، ئەم بابەتە ترسی لای سیاسییەکان و فەرماندە سەربازییەکانی عێراق دروستکردوە.

هەرچەندە سەباح نوعمان، وەک وتەبێژی فەرماندەی هێزە چەکدارەکانی عێراق ئەم کشانەوەیە وەک دەستکەوتی عێراق تەماشا دەکات و بە رۆژنامەکەی وتوە: ئەم کشانەوەیە ئاماژەیە بۆ توانای وڵاتەکەمان لە بەرەنگاربونەوەی تیرۆر و پاراستنی ئاسایش بەبێ ئەوەی پێویستمان بە پشتیوانی دەرەکی بێت.

بەڵام ئەسکەندەر وەتوت، ئەندامی لیژنەی ئاسایشی و بەرگریی لە ئەنجومەنی نوێنەرانی عێراق دەڵێت: هەنگاوەکەی ئەمەریکا لەم کاتەدا جێگەی سەرسوڕمانە، بە لەبەرچاوگرتنی ئەو دۆخە سیاسی و ئەمنییەی بەرۆكی ناوچەكەی گرتووە.

دەشڵێت؛ ئەم کشانەوەیە بە هیچ شێوەیەک لە بەرژەوەندی عێراق نییە و لەگەڵ لایەنە پەیوەندیدارەکانی و ئەمنیی و سەربازییەكانی حکومەت ئەو نیگەرانیانە تاوتوێ دەکەین بە تایبەت بڕیارەکە لە ئەستۆی فەرماندەی گشتی هێزە چەکدارەکانی عێراقە.