ئەندامێکی لیژنەی دارایی پەرلەمانی عێراق رایگەیاند: لە عێراق مانگانە 10 ملیۆن و 500 هەزارکەس موچەوەردەگرن و مانگانە بڕی 8 ترلیۆن دینار تەرخاندەکرێت بۆ خەرجی موچەخۆران

هەواڵ: KNNC


ئەمڕۆ سێشەممە لیژنەی دارایی پەرلەمانی عێراق ئاشکرایکرد، زیاتر لە 10 ملیۆن هاوڵاتی مانگانە موچە لە دەوڵەت وەردەگرن.

موعین کازمی ئەندامی لیژنەکە ڕاگەیاند: "وەزارەتی دارایی مانگانە 8 ترلیۆن دینار وەک مووچە بۆ فەرمانبەران و خانەنشینان و ئەوانەی تۆڕی پاراستنی کۆمەڵایەتی دەیگرێتەوە دابین دەکات".

کازمی وتیشی: ژمارەی ئەو فەرمانبەرانەی کە مووچەکانیان لە دەوڵەت وەردەگرن گەیشتووەتە زیاتر لە 4.2 ملیۆن فەرمانبەر، لە کاتێکدا ژمارەی خانەنشینەکان 3 ملیۆن کەس تێدەپەڕێنێت، ئەوانەیشی تۆڕی پاراستنی کۆمەڵایەتی دەیانگرێتەوە 3 ملیۆن کەس تێدەپەڕێنن.

ڕوونیشیکردەوە، کۆی ئەو سودمەندانەی کە مووچەکانیان لە دەوڵەت وەردەگرن دەگاتە 10 ملیۆن و 500 هەزار موچەخۆر.

وتیشی:  دابینکردنی موچەی موچەخۆران تا کۆتایی ئەمساڵ بە تەواوی مسۆگەرە، بەو پێیەی داهاتی نەوت مانگانە زیاتر لە 6 ملیار دۆلارە.