ئاژانسە هەواڵیەکان  بڵاویانکردۆتەوە، ئەسعەد شەیبانی، وەزیری دەرەوەی سوریا لە پاریس چاوی بە شاندێکی ئیسرائیلی کەوتووە و چەند تەوەرێکی گرنگیان تاوتوێ کردووە.

هەواڵ: KNNC


بەگوێرەی زانیارییەکانی ئاژانسی سانا، شەیبانی لەگەڵ شاندە ئیسرائیلییەکە چەند تەوەرێکی گرنگیان تاوتوێ کردووە، لەنێویاندا دەستوەردانی دەرەکی بۆ کاروباری سوریا، پتەوکردنی سەقامگیری لە باشووری سوریا بەدیاریکراوی شاری سوەیدا و راگەیاندنی ئاگربەست لەو ناوچانەو کاراکردنەوەی ڕێککەوتنی ساڵی ١٩٧٤  کە تێیدا باس لە راگرتنی شەڕ کراوە لەنێوان سوریا و ئیسرائیل.



ئاژانسی سانا ئاماژەی بەوەکردوە، ئەم گفتوگۆیانە "بە نێوەندگیری ئەمریکا، لە چوارچێوەی هەوڵە دیپلۆماسییەکان بە ئامانجی بەرزکردنەوەی ئاسایش و سەقامگیری لە سوریا و پاراستنی یەکپارچەیی خاکی سوریایە



لای خۆیەوە، تۆم باراک، نێردەی تایبەتی ئەمریکا ڕایگەیاند، "ئەمڕۆ کۆبوونەوەیەکی گەرم و پڕ زانیاریی لەگەڵ شێخ موفەق تاریف، سەرکردەی ڕۆحی دروزەکانی ئیسرائیل و تیمەکەی" ئەنجامداوە، جەختیشی لەوە کردەوە کە باسیان لە "دۆخی  شاری سوەیدا و چۆنیەتی تێکەڵکردنی بەرژەوەندییەکانی هەموو لایەنەکان و کەمکردنەوەی گرژییەکان و بنیاتنانی لێکتێگەیشتن کردووە".

ئەم کۆبونەوانە لە کاتێکدایە ڕۆژی 12ی ئەم مانگە، وەزیری دەرەوەی سوریا شەیبانی لە عەممان لەگەڵ هاوتا ئوردنییەکەی، ئەیمەن سەفادی و تۆم باراک، نێردەی تایبەتی ئەمریکا لە سووریا کۆبووەوە. ئاماژەی بەوەشکرد، “لە میانی کۆبوونەوەکەدا باس لە ڕێگاکانی بەرزکردنەوەی هاوکاری و هەماهەنگی نێوان هەر سێ لایەن کرا.