ڕوانگەی سوری بۆمافەكانی مرۆڤ ئاشكرایكرد؛ زیاتر لە 160 بارهەڵگری سەربازیی ئەمریكا لەهەرێمی كوردستانەوە ڕویان لەرۆژئاوای كوردستان و ناوچەكانی ژێر دەسەڵاتی هێزەكانی سوریای دیموكرات كردوە.
بەپێی راگەیەنراوێكی ڕوانگەی سوری بۆمافەكانی مرۆڤ ؛ لەماوەی ئەم مانگەدا نزیكەی 170ئۆتۆمبیلی بارهەڵگری سەربازیی ئەمریكاو هاوپەیمانان كەلوپەلی جەنگیی و لۆجستیان لەهەرێمی كوردستانەوە بۆ رۆژئاوای كوردستان
گواستوەتەوە.
ئاماژە بەوەشكراوە لە رۆژی 4ی ئەم مانگەدا 38 بارهەڵگر و لەرۆژی 6ی هەمان مانگدا 37 بارهەڵگری پڕ لەچەك و تۆپهاوێژ و 15 بارهەڵگری تری باركراو لە زریپۆش و 20 بارهەڵگریتر لە سەكۆی كۆنكرێتی و سوتەمەنی گەیەنراونەتە رۆژئاوای كوردستان .
بەپێی هەمان راگەیەنراو لە رۆژی 11 ئابیشدا 40 بارهەڵگری تر گەیشتونەتە بنكەی سەربازیی خراب جیر لەسنوری رمێلان و لە 13ی ئەم مانگەشدا 20 بارهەڵگری تر گەیەنراونەتە بنكەی هاوپەیمانان لەسنوری حەسەكە.
جەختیشكراوەتەوە كە هەر لەماوەی ئەم مانگەدا هاوپەیمانی نێودەوڵەتی بەبەشداری هێزەكانی هەسەدە چوارجار مەشق و ڕاهێنانیان ئەنجامداوە كەتیایدا راهێنان لەسەر بەكارهێنانی چەكی قورس و بەكارهێنانی بۆمبی رۆشنكەرەوەو چۆنیەتی بەرەنگاریبونەوەی فرۆكەی درۆن و پێكدادانی شەوانە كراون.
270 جار خوێندراوەتەوە