ئاژانسی سانای وڵاتی سوریا بڵاویکردوەتەوە، دیمەشق  و ئەنقەرە  ڕێککەوتنێکی هاوبەشی سەربازیان واژۆکرد، کە ئامانج لێی بەرزکردنەوەی تواناکانی سوپای سوریا و پەرەپێدانی دامەزراوە و پێکهاتەکەی سوپاکەیە، کە تەمەنیكی وای نییە.

هەواڵ:KNNC

ئەمڕۆ چوارشەممە، ئاژانسی سانا بڵاویکردوەتەوە، سوریا و تورکیا ڕێکەوتنێکی هاوبەشی بەرگریان واژو کرد و ڕێککەوتنەکە بریتییە لە پاڵپشتیکردنی چاکسازیی هەمەلایەنەی کەرتی ئەمنی و ئاڵوگۆڕی کارمەندانی سەربازی بۆ بەشداریکردن لە خولی ڕاهێنانی تایبەتمەند.

وەزارەتی بەرگری تورکیاش ڕایگەیاند، یاشار گولەر وەزیری بەرگریی نیشتمانی لەگەڵ موحەف ئەبو قەسرە وەزیری بەرگری سوریا و ئەسعەد شەیبانی وەزیری دەرەوەی سوریا و حوسێن سەلامە سەرۆکی هەواڵگری سوریا کۆبوەوە.

 دوای  کۆبونەوەکەش وەزیرانی بەرگری تورکیا و سوریا یاداشتێکی لێکتێگەیشتنیان لەسەر مەشق و ڕاوێژکاری سەربازی واژۆ کردوە.

ڕاهێنان لەسەر کارامەیی بەرەنگاربونەوەی تیرۆر و پاککردنەوەی مین لەخۆدەگرێت، جگە لە پێشکەشکردنی هاوکاری تەکنیکی بۆ پاڵپشتیکردنی مۆدێرنکردنی سیستەمی سەربازییش بەشێکە لە ڕێکەوتنەکە.

ئاماژەیان بەوەشکردوە،  ئامانجی ڕێککەوتنەکە ڕاهێنانی کارمەندانی سوپای سوریایە بەپێی ستانداردە نێودەوڵەتییەکان و کەمکردنەوەی مەترسی پێشێلکارییەکان کە ڕەنگە لەلایەن بەشێک لەو گروپانەوە ئەنجامبدرێن کە لە ئێستادا لەناو سوپادا جێیانکراوەتەوە.