ئێران رەخنە لە سەرۆکى ئەمەریکا دەگرێت بەوەى "یاریی" بە وڵاتەکەیان دەکات لەبارەى پرسى لابردنى سزاکانەوە و نایەوێت چارەسەرى کێشەى نێوان هەردو وڵات بکات.

هەواڵ:KNNC

ئیسماعیل بەقائى، وتەبێژى وەزیرى دەرەوەى ئێران لە کۆنگرەیەکى رۆژنامەوانییدا رایگەیاند؛ دەبێت وتەکانى ترەمپ لە چوارچێوەى یاریی دەرونى و راگەیاندن وەربگرین نەک هەوڵێکى جددى بۆ چارەسەرى کێشەکان و پێشخستنى گفتوگۆکان.

دۆناڵد ترەمپى سەرۆکى ئەمەریکا دواى وتەکانى عەلى خامنەییەوە بڕیاریدا کە جارێکى دیکە بیر لە کەمکردنەوەى سزا ئابورییەکانى سەر ئێران نەکات.

لەوبارەیەوە سەرۆکى ئەمەریکا لە تروس سۆشیاڵ نوسیویەتى:" لەماوەى چەند رۆژى رابردودا بیرم لە ئەگەرى لابردنى سزاکانى سەر ئێران کردبوەوە کە هەلى بوژانەوەى خێراى دەدایە وڵاتەکە، لەجێی ئەوە وتارێکى پڕ لە رق و توڕەییم وەرگرتەوە".

ئاماژەى بۆ ئەوەشکرد کە بەخێرایی کارەکانى بۆ کەمکردنەوەى سزاکان راگرتوە و ئێرانیش دەبێت بگەڕێتەوە بۆ رەوتى سیستمى جیهانیی ئەگەرنا شتەکان زۆر خراپتر دەبێت بۆیان.