رێجیم خۆی نابێتەهۆی دروستبونی ئازاری گەدە، بەڵام ئەو گۆڕانکارییانەی لە سیستمی خۆراکیدا دەبنە هۆی ئازار و ناڕەحەتی گەدە، بۆ نمونە:

-دڵەکزێ و بەزەحمەت هەرسکردنی خۆراک؛ بەهۆی گۆڕینی جۆر و بڕی خواردن لەکاتی رێجیمدا، بۆنمونە ئەگەر بڕێکی زیاتر لە کاتی ئاسایی ماددە پرۆتینییەکان بخورێت، ئەنزیمەکانی ناو گەدە فریا ناکەون بە باشی هەرسی بکەن ئەوەش دەبێتەهۆی کۆبونەوەی خواردن لە گەدە و ئاوسانی گەدە.

-تێکچونی کۆئەندامی هەرس بەهۆی نان خواردن بە پەلە یان خواردنی ئەو خۆراکانەی بڕێکی زۆر بەهارات و بیبەری توندیان تێدایە.

-ئازاری گەدە بەهۆی ماددە ریشاڵییەکانەوە؛ کەم خواردنی ماددە ریشاڵییەکان دەبێتەهۆی خاوبونەوەی پرۆسەی هەرسکردن و قەبزی و غازاتی زۆر و دواتر ئازاری گەدە، هەندێک جاریش خواردنی بڕی زۆر لە ماددە ریشاڵییەکان لە پڕ لەو کەسانەی پێشتر نەیانخواردوە دەبێتەهۆی ئاوسانی گەدە و ریخۆڵەکان.

- خواردن پێنەکەوتن؛ بۆ نمونە ئەوانەی کە کێشەی پێنەکەوتنی لاکتۆزیان هەیە لەکاتی خواردنی شیر و بەرهەمەکانی بە بڕێکی زۆر.

- هەستیاری بە خۆراک یان پێکهاتەکانی ناوی

-گۆڕینی کاتی ژەمەکان یان نەخواردنی ژەمێک یان زیاتر لەو کەسانەی کە رێجیمی رۆژوی پچڕ پچڕ دەکەن یان رێجیمی نازانستی و زۆر قورس دەکەن بەهۆی برسێتییەوە.

د. کامه‌ران رسوڵ ژاژڵه‌یی، پزیشکی پسپۆڕی زانستی خۆراک