حکومەتی عێراق نیگەرانی خۆی لە هێرشەکانی ئەمەریکا بۆسەر ئێران دەردەبڕێت و رایگەیاند، هێرشەکانی بەرەبەیانی ئەمڕۆ مەترسییەکی جدی بۆسەر ئاسایشی رۆژهەڵاتی ناوەڕاست دروستدەکات.

هەواڵ:KNNC

لە بەیاننامەیەکدا حکومەتی عێراق رایگەیاندوە، نیگەرانن لە بەئامانجگرتنی دامەزراوە ئەتۆمییەکانی ئێران.

دەشڵێت: ئەو هێرشانە دەبێتەهۆی مەترسییەکی جدی بۆسەر ئاسایش و ئاشتی لە رۆژهەڵاتی ناوەڕاست و سەقامگیری ناوچەکە دەخاتە مەترسییەوە.

عێراق، داوای رێزگرتن لەسەروەری وڵاتان و بەئامانج نەگرتنی دامەزراوە گرنگەکانیان دەکات، بەتایبەت ئەوانەی لەژێر چاودێری ئاژانسی نێودەوڵەتی وزەی ئەتۆمدان و بۆمەبەستی ئاشتییانە بەکاردەهێنرێت.

جەختیشدەکاتەوە، چارەسەری سەربازی ناتوانێت جێگرەوەی دیالۆگ و دیپلۆماسی بێت، هەروەها بەردەوامبونی ئەم هێرشانە دەبێتەهۆی پەرەسەندنی مەترسیدار و کاریگەری لەسەر سەقامگیری ناوچەکە و جیهان دەبێت.

حکومەتی عێراق، لە سۆنگەی هەستکردن بە بەرپرسیارییەتییەوە داوای دەستبەجێ کەمکردنەوەی گرژییەکان و دۆزینەوەی رێگەی دیالۆگ دەکات، بۆ کۆنتڕۆڵکردنی دۆخەکە و هەوڵدان بۆ هێورکردنەوەی دۆخەکە و رێزگرتن لە یاسا نێودەوڵەتییەکان.