خواردنەوەی چای گەرم لە هاویندا کاتێک پلەی گەرمی زۆر بەرزە، یارمەتی کەمکردنەوەی تینویەتی دەدات، بەمەرجێک ئەو شوێنەی لێی دەخورێتەوە کراوەبێت و هەوا بە باشی ئاڵوگۆڕ بکات.

تەندروستی:KNNC

د. کامەران ژاژڵەیی، پسپۆڕی زانستی خۆراک دەڵێت: خواردنەوەی چا یان هەرخواردنەوەیەکی گەرم دەبێتەهۆی کشانی ملولەکانی خوێن و زیادکردنی رێژەی ئارەقکردنەوە و دابەزینی پلەی گەرمی جەستە، بەڵام بەمەرجێک شوێنەکە کراوەبێت.

دەشڵێت: بەپێچەوانەوە خواردنەوەی ئاوی سارد یان شەربەتی فرێشی سارد یان ئاو و لیمۆی سارد، لە شوێنی داخراو و ژوردا یارمەتی کەمکردنەوەی تینویەتی دەدات.

ئامۆژگاریشمان دەکات، لە دەرەوەی ژور و لە شوێنە کراوەکان خواردنەوەی چا یا شیرێکی گەرم یا ئاوی گەرم باشترە لە ئاوی سەهۆڵاو یا شەربەتی فرێشی سارد، چونکە خواردنەوە ساردەکان ڕێژەی ئارەق کردنەوە کەم دەکەنەوە و نابێتە هۆی شکاندنی تینویەتی و دوای ماوەیەکی کورت دووبارە تینووت دەبێتەوە.

هەروەها، خواردنەوەی چای گژوگیای گەرمی وەک گوڵەبەیبون یا لیمۆ و نەعنای گەرم یان شیری گەرم لە چا و قاوە باشترە، هەروەها پێویستە لە هاویندا مرۆڤ دور بکەوێتەوە لە خواردنەوە گازی و وزە بەخشەکان، رۆژانە چەند جارێ سەوزە و میوە بخوات .