ئەمساڵ دوو جەژنی ئایینی و نەتەوەیی هاوکاتن و بارانیش لە هەردوو جەژنەکەدا دەبارێت، کەشناسێکیش دەڵێت: لە 13 رۆژی کۆتایی ئەم مانگەدا لە نێوان 100 بۆ 300 ملم باران دەبارێت.

دوای ئەو شەپۆلە بارانەی هەرێمی کوردستانی گرتەوە، رۆژانی سێ شەممە و چوارشەممە کەش و هەوا جێگیر و سەقامگیر دەبێت و پلەکانی گەرماش 4 بۆ 5 پلە بەرزدەبنەوە، ئەمەش بە وتەی ئاراس جەبار شارەزای کەشناسی.

ئەو کەشناسە ئاماژەی بەوەشکردووە، لە رۆژی پێنج شەممە 19/3/2026 سەرلەنوێ هەرێمی کوردستان و وڵاتانی ناوچەکە دەکەونە ژێر کاریگەری دوو نزمە پاڵەپەستۆی قوڵ لەدەریای ناوەراست و سوورەوە و شەپۆلێکی بەهێزی لێزمە باران و هەورە بروسکە دەستپێدەکاتەوە و لەگەڵ بارینی بەفر لەسەر لوتکەی چیابەرزەکان و دابەزینی پلەکانی گەرما بە رێژەی 5 بۆ 6 پلەی سیلیزی.

کاریگەری نزمەپاڵەستۆکەی دەریای ناوەراست ئەمجارە پێشبینی دەکرێت بۆ ماوەیەکی درێژ لەسەر ناوچەکە بمێنێتەوە بەدرێژای رۆژانی جەژنی رەمەزان و نەورۆز تا کۆتای ئەم مانگە 31/3/2026 کاریگەریەکانی بەردەوامی ئەبێت بەدرێژایی ئەو ماوەیەش کەش و هەوای هەرێمی کوردستان ناجێگیر ئەبێت.

بڕی بارانی پێشبینی کراو لە نێوان 19/3/2026 بۆ کۆتایی مانگ بەم جۆرەیە:

سلێمانی و هەڵەبجە 200 - 250 ملم

پارێزگای دهۆک و ئیدارەی زاخۆ 200 - 300 ملم

سەنتەری پارێزگای هەولێر و ناوچە نزمەکان 50 - 100 ملم ناوچە شاخاویەکانی پارێزگا و ئیدارەی سۆران بەگشتی 200 - 300 ملم

ئیدارەی راپەرین 100 - 200 ملم

پارێزگای کەرکوک و ئیدارەی گەرمیان 100 - 150 ملم