بە وتەی شارەزایەکی کەشناسی، شەپۆلێکی بەهێزی باران روو لە هەرێمی کوردستان دەکات و لە هەندێک ناوچە ئەگەری بارینی 300 ملم باران هەیە و چەند ناوچەیەکیش لەبەردەم مەترسی دروسبوونی لافاودان.

ئاراس جەبار رایگەیاند:   دوابەدوای ماوەیەک لەلاوازبوونی شەپۆلەکانی بارانبارین و ناچالاکی شەپۆلە مەداریەکان لە 12ی ئەم مانگەوە ناجێگیری لە کەشوهەوا دروست دەبێت و تا 24ی مانگ بەردەوام دەبێت.

روونیشیکردەوە: لەماوەی ئاماژەپێکراودا ناجێگیری بەهێز لە کەشوهەوادا دروستەبێت بەهۆی کۆبوونەوەی هەوای شێدار و گەرم لەگەڵ هەوای ساردی چینە بەرزەکانی ئاسماندا کە هۆکارن بۆ دروستبوونی کەڵەکە هەوری گەورەی سوپەرسێڵ کە هەورە بروسکەی توند و لێزمە باران و تەرزەیان لەگەڵ ئەبێت بەتایبەت لە رۆژانی 15 و 16ی مانگ ناجێگیریەکە بەهێزتر ئەبێت لە سەرجەم ناوچەکانی هەرێمی کوردستان و عێراق ئەگەری بارینی بارانێکی زۆر ئەبێت کە لەهەندێ شوێندا ئەگەری دروستبوونی لافاویشی لێدەکرێت لەگەڵ بارینی تەرزەی گەورە و دروستبوونی گەردەلولی تۆڕنادۆ بەتایبەت لەناوچە گەرمەکان.

سەبارەت بە پێشبینییەکان بۆ بڕی بارانبارین ئەو کەشناسە رایگەیاند:

ناوچەکانی سنووری پارێزگای سلێمانی و دهۆک و هەولێر و هەڵەبجە و ئیدارەی سۆران و راپەرین لە 150 ملم تا زیاتر لە 300 ملم

ناوچەکانی سنووری ئیدارەی گەرمیان و پارێزگای کەرکوک و بەگشتی ناوچە نزمەکان و ناوچەکانی عێراق 70 ملم تا زیاتر لە 150ملم .