بەڕێوەبەری گشتی بازرگانی هەرێمی کوردستان دڵنیایی دەدات کە جموجۆڵی بازرگانی هەرێمی کوردستان-ئێران ڕانەگیراوە و هیچ مەترسییەکیش لەسەر کەمی خۆراك نییە، دەشڵێت: هەر فرۆشیارێك نرخ بەرزبکاتەوە سزا دەدرێت.

هەواڵ:KNNC

نەوزاد شێخ کامیل – بەڕێوەبەری گشتی بازرگانی هەرێمی کوردستان بە کەی ئێن ئێنی وت: جموجۆڵی بازرگانی و هاوردەکردنی خۆراك و پێداویستییەکان لە نێوان ئێران-هەرێمی کوردستان بەردەوامە.

ئاماژەی بەوەشکردوە: هیچ مەترسییەك بۆ کەمی خۆراك نییە، بەو پێیەی بەتەنها کۆگاکانی خواردنی کەرتی تایبەت لە هەرێمی کوردستان بەشی شەش مانگ خواردنییان تێدایە.

زیاتر روونیشیکردەوە: سەرچاوەی سەرەکی هاوردەکردنی خۆراك زیاتر لە تورکیاوەیە و ئێستاش هاوردەکردن بەردەوامە، دەشڵێت: وەزارەتی بازرگانی عێراق دوپاتیکردوەتەوە کە تەنانەت بۆچەند مانگێك بەشە خۆراك بۆ تەواوی عێراق بە هەرێمی کوردستانیشەوە لەبەردەستدایە.

باسی لەوەشکرد: لیژنەکانییان لەم دۆخەدا زیاتر کردوە بەمەبەستی رێگریکردن لە بەرزکردن و گرانکردنی نرخی خۆراك، وتیشى، لیژنەکانییان بەردەوام سەردانی فرۆشگا و ناوچە بازرگانییەکان دەکەن، و هەرکەسێک خواردن لە نرخی زیاتر بفرۆشێت ئەوا سزای دەدەن و ڕێکاری یاسایی توندی لەبەرامبەر دەگرنە بەر.