شەپۆلێکی خۆڵبارین هەرێمی کوردستان دەگرێتەوە و هاوکات پلەکانی گەرما بەڕێژەیەکی بەرچاو دادەبەزن.

بەپێی پێشبینییەکانی بەڕێوەبەرایەتی گشتیی کەشناسیی و بوومەلەرزەزانی هەرێم، سبەی هەینی (29ی ئایاری 2026)، شەپۆلێکی خۆڵبارین ڕوو لە ناوچەکانی هەرێمی کوردستان دەکات. سەرەتا کاریگەرییەکانی شەپۆلەکە لە کاتەکانی بەیانیدا لە ناوچەکانی باشوور و ڕۆژئاوای هەرێم دەردەکەون، پاشان لە دوای نیوەڕۆدا زۆربەی ناوچەکانی دیکەی هەرێم دەگرێتەوە و تا ئێوارەی ڕۆژی شەممە بەردەوام دەبێت.

 لەگەڵ ئەم گۆڕانکارییەدا، پلەکانی گەرما بەراورد بە ئەمڕۆ پێنجشەممە، بە نزیکەی 4 بۆ 6 پلە نزمدەبنەوە.

سەبارەت بە کەشوهەوای ئەمڕۆ پێنجشەممە (28ی ئایاری 2026)، ئاسمان بەگشتی نیمچە هەور دەبێت لەگەڵ ئەگەری بوونی تۆزێکی سووک لە کەشدا، هەروەها پلەکانی گەرما بەراورد بە دوێنێ 2 بۆ 3 پلە بەرزبوونەوە بەخۆیانەوە دەبینن. خێرایی با لە نێوان 10 بۆ 20 کیلۆمەتر دەبێت لە کاتژمێرێکدا و مەودای بینینیش لە نێوان 7 بۆ 8 کیلۆمەتردا دەبێت.

پێشبینی دەکرێت بەرزترین پلەکانی گەرما بۆ سبەی هەینی لە شارە سەرەکییەکان بەم شێوەیە بن: هەولێر 31 پلە، سلێمانی 29 پلە، دهۆک 30 پلە، هەڵەبجە 31 پلە، پیرمام 26 پلە، زاخۆ 32 پلە، چەمچەماڵ 30 پلە، حاجی ئۆمەران 21 پلە، و گەرمیانیش 35 پلەی سیلیزی دەبێت.