شارەزایەکی بواری کەشناسی ڕایدەگەیەنێت، شەپۆلێکی سەرما و بەفربارین کە ناوچە جیاوازەکانی گرتووەتەوە، لە چەند ڕۆژی داهاتوودا کاریگەرییەکانی دەگاتە هەرێمی کوردستان و عێراق، کە بەهۆیەوە پلەکانی گەرما بە شێوەیەکی بەرچاو و دەگمەن بۆ ئەم کاتەی ساڵ دادەبەزن.

ئاراس جەبار، شارەزای بواری کەشناسی بڵاویکردەوە، دوای ئەوەی لە دوێنێوە شەپۆلێکی بەفربارین تورکیای گرتەوە و بەرزاییەکانی ئەو وڵاتەی سپی پۆش کرد، پێشبینی دەکرێت نزمەپاڵەپەستۆیەکی سارد و جەمسەری ڕوو لە لوبنان، سوریا و باکووری کوردستان بکات.

ئاماژەی بەوەشکردووە، لە ڕۆژی دووشەممە (4ی ئایاری 2026)، کاریگەریی ئەو هەوا ساردە دەگاتە ناوچەکانی باکووری سعودیە، عێراق و هەرێمی کوردستان، هەرچەندە لە کاتی گەیشتنی بەم ناوچانە تا ڕادەیەک لاواز دەبێت، بەڵام پلەکانی گەرما بە شێوەیەکی بەرچاو دادەبەزن و لە شەواندا کەشێکی سارد باڵ بەسەر ناوچەکەدا دەکێشێت.

ئەو شارەزایەی کەشناسی دەشڵێت: "ئەگەری تاوە باران و بروسکە لە کات و شوێنی جیاوازدا هەیە، لەگەڵ ئەگەری بەفربارین لە لوتکەی چیا زۆر بەرزەکان کە بەرزییان سەروو سێ هەزار مەترە، ئەم شەپۆلەش تا کۆتایی هەفتە بەردەوام دەبێت و پلەکانی گەرما لە خوار ئاستی ئاسایی خۆیانەوە دەمێننەوە."