بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، پێشبینییەکانی کەشوهەوای ٤٨ کاتژمێری داهاتووی بڵاوکردەوە و ئاماژە بەوە دەکات، ئەمڕۆ لە چەند ناوچەیەک ئەگەری تاوەباران هەیە و سبەینێش پلەکانی گەرما بەرز دەبنەوە.

بەپێی پێشبینییەکانی کەشناسی بۆ ئەمڕۆ شەممە (30ی ئایاری 2026)، ئاسمان پەڵەهەور دەبێت و لە ناوچە شاخاوییە سنوورییەکان بۆ نیمچەهەور و هەوری تەواو دەگۆڕێت. هاوکات ئەگەری بارینی نمەباران و هەندێک کاتیش تاوەباران و هەورەبروسکە هەیە، بەتایبەتی لە سنووری ئیدارەی سەربەخۆی سۆران، زاخۆ و پارێزگای دهۆک.

خێرایی با لەسەرخۆ بۆ مامناوەند دەبێت (10-20 کم/ک) بە ئاراستەی باکووری ڕۆژئاوا، وە پلەکانی گەرماش کەمێک نزمتر دەبن بەراورد بە تۆمارکراوەکانی دوێنێ.

سەبارەت بە کەشوهەوای سبەینێ یەکشەممە (31ی ئایار)، کەشناسیی هەرێم پێشبینی دەکات ئاسمان بەگشتی ساماڵ و پەڵەهەور بێت. پلەکانی گەرما بەراورد بە ئەمڕۆ کەمێک بەرزتر دەبنەوە، بە جۆرێک بەرزترین پلەی گەرما لە گەرمیان تۆمار دەکرێت کە 35 پلەی سیلیزییە و فێنکترین ناوچەش حاجی ئۆمەران دەبێت کە 20 پلەی سیلیزییە.