وا باوە ڕەنگەکان تەنها خەسڵەتێکی جوانکارییان هەیە، بەڵام لەڕاستیدا ڕەنگەکان زمانێکی تایبەتیان هەیە، کە مێشک و هەستەکانمان دەدوێنن، ڕەنگە جیاوازەکان بەبێ ئەوەی هەستی پێبکەین و بەشێوەیەکی ڕاستەوخۆ کاریگەریان لەسەر دەرون و بڕیارە ڕۆژانەییەکانمان هەیە.

هەر ڕەنگێک وزەیەکی تایبەت بە خۆی هەیە کە بە جیاوازی کاریگەریمان لەسەر دروست دەکات.

سور؛ ڕەنگێکی بەهێز و بوێرانەیە، لێدانی دڵ زیاد دەکات و بۆ بەرزکردنەوەی ئاستی وزەش بەکاردێت لەناو ماڵدا یاخود لەکاتی پۆشینیدا، زیادەڕەوییکردن لە پۆشین یان بەکارهێنانی سوردا دەبێتە هۆکاری هەستکردن بە توڕەیی و سترێس.

شین؛ ڕەنگی ئاسمان و دەریایە، دەبێتە مایەی هێمنی و متمانە بەخۆبون و دەبێتە هۆکاری کەمکردنەوەی دڵەڕاوکێ، ئەگەر ڕەنگی شین زۆر بپۆشرێت یان ڕەنگێکی زاڵ بێت لەناو ماڵدا، دەبێتە هۆی خەمباری و ساردبون.

زەرد؛ ڕەنگی خۆر، هەستی گەشبینی و دڵخۆشی زیاد دەکات، زیادەڕەوییکردن لە پۆشینیدا دەبێتە هۆی دروستبون و بڵاوبونەوەی دڵەڕاوکێ.

سەوز؛ ڕەنگی سروشتە، هێمای هاوسەنگی و گەشەسەندنە، هەستی ئارامی و جێگیربون دەبەخشێت،کلتور و تەمەن و ڕەگەزیش کاریگەرییان هەیە لەسەر هەڵبژاردنی ڕەنگ و دروستبونی تێگەیشتنێکی جیاواز دەربارەیان.

لە بەشێکی زۆر لە کۆمپانیا و ئۆفیسەکانیشدا، ڕەنگەکان بە وریاییەوە هەڵدەبژێردرێن، بۆ زیادکردنی وزەی بەرهەمهێنان و داهێنان.

لە بواری چارەسەری دەرونیشدا، تەکنیکی چارەسەر بە ڕەنگ هەیە، کە تیشکی جیاوازی ڕوناکی بە تۆن و ڕەنگی جیاواز بەکاردەهێنرێت.