روانگەی سوری رایدەگەیەنێت: لە ئەنجامی توندوتیژی روداوەكانی سوریا ئەمڕۆ (93) هاوڵاتی مەدەنی كوژران بەوەش كۆی قوربانیان گەیشتە هەزار و (476) كەس.


هەواڵ: (KNNC)


روانگەی سوری بۆ مافەکانی مرۆڤ بڵاویكردەوە؛ لەئەنجامی توندوتیژی و روداوە نەخوازراوەكان لەشارەكانی تارتووس، لازقییە، حەما و حومس چوار كۆمەڵكوژی تۆمارکراوە بەهۆیەوە (93) هاوڵاتی مەدەنی لە كەناراوەكانی سوریا کوژران.


راشیگەیاندوە: كۆی ئەو قوربانیانەی لە روداوەكانی چەند رۆژی رابردو گیانیان لەدەستداوە گەیشتوەتە هەزار و (476) كەس، ئەمە جگە لە ئاوارەبونی ژمارەیەكی زۆری هاوڵاتیان.


روانگەی سوری ئاماژەی بۆ ئەوەشكردوە، ژمارەی ئەو پەنابەرە سوریانەی کە لە کەناراوەکانی سوریا رویان  لە باکوری لوبنان كردوە، بەتایبەتی ناوچەی ئەکار و جەبەل موحسن لە تەرابلوس، لە چەند کاتژمێری  رابردودا گەیشتوەتە نزیکەی (10) هەزار کەس.


لای خۆشیەوە ماریا زاخارۆڤا، وتەبێژی وەزارەتی دەرەوەی روسیا رایگەیاند: بنکەی حومەیمیمی روسیا لە لازقیە پێشوازی لە نزیکەی نۆ هەزار هاوڵاتی سوری کردوە کە زۆربەیان ژن و منداڵن، لە توندوتیژییەكانی  ناوچەکان لە کەناراوەکانی سوریا هەڵدێن.