پۆلیسی تایلەند رایگەیاند لەباخچەیەکی گەشتیاریدا، کچێکی ئیسپانی لە کاتی شۆردنیدا فیلێک هێرشدەکاتە سەری و دەستبەجێ گیان لەدەستدەدات

هەواڵ:KNNC

پێگەی بی بی سی بڵاویکردوەتەوە؛ بلانکا ئۆخانۆرن گارسیا، ناوی ئەو کچە تەمەن 22 ساڵەیە، کە لەگەڵ خۆشەویستەکەی گەشتێکی بۆ تایلەند کردوە، لەکاتی شۆردنیدا فیلەکە هێرشدەکاتە سەری و بەهۆیەوە گیانی لەدەست داوە.

روداوەکە لە شاری( کۆ یاو) لە تایلەند رویداوە، کە شوێنێكی گەشتیارییە و  ساڵانە ژمارەیەکی زۆر گەشتیار سەردانی دەکەن، گەشتیاران دەتوانن بە نزیکەی 55  دۆلار  فیلەکان بشۆن و خۆراکیان پێبدەن و لە نزیکەوە بیانبین و  وێنەیان لەگەڵدا بگرن.


لەبارەی روداوەکەوە، شارەزایان وتویانە ڕەنگە فیلەکە بەهۆی بەرکەوتنی لەگەڵ گەشتیاران لە ژینگەیەکی دەرەوەی شوێنی نیشتەجێبونیدا توشی سترێس و دڵەڕاوکێ بوبێت، ئەمەش هۆکاربوە بە پەلاماردانی گەشتیارەکە.

شۆردنی فیل وەک چالاکییەکی گەشتیاری بەناوبانگە لە وڵاتەکە، بەپێی ئامارە فەرمییەکان نزیکەی هەشت هەزار فیل لە تایلاندا هەن.

نیوەی ئەو فیلانە ئازادن و نیوەکەی تریش لە ناوەندەکانی پاراستن و باخچەی ئاژەڵان ڕاگیراون و بۆ سەرنجڕاکێشانی گەشتیار بەکاردەهێنرێن.