بڕیارى بڕینى 1%ـى موچەى موچەخۆرانى عێراق بۆ هاوکاریی کەرتى غەززە  و لوبنان لایەن عێراقییەکانەوە رەت دەکرێتەوە، ئەوان دەڵێن: پێویستە حکومەت لەبارەى ئەو پرسانەوە بڕیار بدات کە لە بەرژەوەندی ئەوانە و دەشڵێن: متمانەیان نییە و دەکرێت لەکۆکردنەوەى ئەو پارەیە گەندەڵى بکرێت.

هەواڵ:KNNC

میدیا عێراقییەکان، لەبارەى بڕیارى حکومەتى عێراق بۆ هاوکاریکردنى کەرتى غەززە و لوبنان بە لێبڕینى 1%ـى موچەى فەرمانبەران و خانەنشینان لە زارى هاوڵاتییانەوە بڵاویکردوەتەوە کە هاوڵاتییان متمانەیان بە رێکارەکانى حکومەت نییە لە کۆکردنەوە و دابەشکردنى ئەو پارەیە و دڵنیان گەندەڵى تێدا دەکرێت.


بەشێک لە هاوڵاتییانى عێراق پشتگیریی ئەم بڕیارە دەکەن و بەشێکیشیان دەڵێن: دەکرێت ئەم پارەیەش هاوشێوەى پارەى نەخۆشخانەکان و هاتوچۆ و داهاتە ناوخۆییەکان بخورێن و کەس نەزانێت بۆ کوێ دەبرێن.


هەروەک جەختیش دەکەنەوە کە پێویستە بڕیارەکانى حکومەت لە خزمەتى هاوڵاتییان و خانەنشینانى عێراقدا بێت و پێویست حکومەت لەبارەى ئەو پرسانەوە بڕیار بدات کە پەیوەندى راستەوخۆیان بە ژیانى خەڵکەوە هەیە.