ئاماری توشبون بە سکچون و ڕشانەوە لە شارەزور لە هەڵکشاندایە و تائێستا 700 کەس رەوانەی نەخۆشخانە کراون.

هەواڵ:KNNC

پەیامنێری کەی ئێن ئێن لە شارەزور رایدەگەیەنێت؛ تەنها لەماوەی دو کاتژمێری ئەمڕۆ پێنجشەممە لەنێوان 8:00ـى بەیانى تا 10:00ـى پێش نیوەڕۆ (200) نەخۆش داخڵی نەخۆشخانە کراون و بەکۆی گشتی تائێستا (700) کەس بەهۆی سکچون و رشانەوە رەوانەی نەخۆشخانەی شەهید رەئوف بەگ کراون و چارەسەریان بۆ کراوە.

پەیامنێری کەی ئێن ئێن رونیکردەوە کە تیمێکی سەر بەڕێوەبەرایەتی خۆپاراستنی سلێمانی سەردانی قەزای شارەزوریان کردوە و لەگەڵ قائیقام و بەرپرسانی سنورەکە لە کۆبونەوەدان و نمونە (سامپڵ) وەرگیراوە بۆ ئەوەی هۆکاری بڵاوبونەوەی ئەو نەخۆشییە بەخێرایی بزاندرێت.

بەپێی زانیارییەکانی کەی کێن ئێن، گومان دەکرێت ئەو کەسانە بەهۆی بەکارهێنانی ئاوی پیسەوە توشی سکچون و رشانەوە بوبێتن و تائێستاش سەرچاوەکەی نادیارە.