زریانی هیلین ژمارەیەک ویلایەتی ئەمەریکا گرتوەتەوە و بەهۆیەوە زیاتر لە 60 کەس گیانیان لەدەستداوە، لە نیپاڵیش نزیکەی 100 کەس بەهۆی لافاوەوە گیانیان لەدەستداوە.

 

هەواڵ: KNNC

 

ئاژانسی فرانس پرێس لەزاری دەسەڵاتدارانی ئەمەریکاوە بڵاویکردوەتەوە، ژمارەی ئەو کەسانەی بەهۆی زریانی هیلێن-ەوە گیانیان لەدەستداوە گەیشتوەتە 63 کەس، هاوکات چەندین کەسیش بەهۆی داخرانی رێگا و پردەکانەوە رێگەیان لێگیراوە و لە ماڵەکانی چەند ویلایەتێکی باشوریش بەدوای ئەو کەسانەدا دەگەڕێن کە گیریان خواردوە لە ناو ماڵەکانیان.

 

هاوکات، تیمە فریاگوزارییەکانی ئەمەریکا لە هەوڵی گەڕانەوەی کارەبا-ن کە بەهۆی زریانەکەوە بڕاوە و لافاو رێگا و بان و چەندین ماڵ و فرۆشگای لەناوبردوە.

 

هەربەپێی ئەو ئامارەی فرانس پرێس بڵاویکردوەتەوە، 24 کەس لە کارۆلینای باشور، 17 کەس لە جۆرجیا، 11 کەس لە فلۆریدا، 10 کەس لە کارۆلینای باکور، بەهۆی زریانەوە گیانیان لەدەستداوە.

 

زریانی هیلین بە پێوەری پێنج پلە لە ئێوارەی رۆژی پێنجشەممەوە چەند ویلایەتێکی ئەمەریکای گرتوەتەوە و خێرایی با-ش لە هەندێک شوێن گەیشتوەتە 225 کیلۆمەتر لە کاتژمێرێکدا، بەهۆیەوە باری نا ئاسایی لە شەش ویلایەتی وڵاتەکە راگەیەنراوە.

 

لەلایەکی دیکەوە، ئەمڕۆ یەکشەممە لافاو چەند شوێنێکی لە کاتماندۆیپایتەختی نیپاڵ گرتوەوە و بەهۆیەوە زیاتر لە 100 کەس گیانیان لەدەستداوە و 64 کەسیش بێسەروشوێنن.

 

دەسەڵاتدارانی وڵاتەکەش، هۆشدارییان داوە بە دانیشتوانی ئەو شوێنانە کە مەترسی کارەسات و ئەگەری رودانی لافاو هەیە، هاوکات زیاتر لە سێ هەزار کارمەندی ئەمنی بۆ رزگارکردنی هاوڵاتیان و دۆزینەوەی ئەو کەسانەی بێسەروشوێن بون لەرێگەی هێلیکۆپتەر و بەلەمەوە بەردەوامن لە گەڕان.

 

هەروەها، بەهۆی زەوی لەرزەوە، بەشێکی زۆر لە رێگە سەرەکییەکان داخراون و سەدان گەشتیار گیرییان خواردوە.

83 جار خوێندراوەتەوە