مانچستەر یونایتد و لیڤەرپوڵ کلاسیکۆى ئینگڵتەرا ئەنجام دەدەن

KNN : Kurdish News Network
09:33 - 22/08/2022
وەرزش

پێش دەستپێکى یارییەکە، شەیتانە سورەکان کاسیمیرۆى بەرازیلى بە هاندەران و دەزگاکانى راگەیاندن دەناسێنێت، لەو رێگەیەشەوە دەیەوێت وزە و هێز بدات بە یاریزانان و هاندەران بۆ بردنەوەى کلاسیکۆ.

یارییەکە، کاتژمێر (10:00)ى ئەمڕۆ بەکاتى هەرێم بە ڕێوە دەچێت کە تێیدا یاریگاى ئۆڵترافۆرد- ى تایبەت بە شەیتانە سورەکان، دەبێتە شانۆى روبەڕوبونەوەى نێوان مانچستەر و لیڤەرپوڵ.

هەردو یانە بە سەرەتایەکى خراپ دەستیان بە یارییەکانى پریمەرلیگ کرد، مانچستەر یونایتد لە دو یارى رابردودا دۆڕاوە و هیچ خاڵێکى نەچنیوەتەوە و ریزبەندى کۆتایى گرتووە، لیڤەرپوڵیش لە دو یارى رابردودا یەکسان بووە و خاوەنى تەنها دو خاڵە.

یارییەکەى ئەمشەو بۆ هەردو یان گرنگ و چارەنوسسازە، چونکە رەکابەرەکانى ئەم دو یانەیە بەردەوامن لە چنینەوەى خاڵەکان و ئەم دو یانەیەش یارى دواى یارى ئەرکیان قورستر دەبێت.

لەپێش دەستپێکى لێدانى فیکەى ناوبژیوان، مانچستەر یونایتد کاسمیرۆى بەرازیلى بە هاندەران و میدیاکان دەناسێنێت، دەشیەوێت لەو رێگەیەوە روح بەبەر یانەکەیدا بکاتەوە و بتوانن ئەنجامى یارییەکە لەبەرژەوەندى خۆیان کۆتایى پێبهێنن.

هەردو یانە لە پریمەرلیگ، (68) جار روبەڕوى یەکترى بونەتەوە، شەیتانە سورەکان لە 28 یاریدا سەرکەوتنیان بەدەستهێناوە و رێدزیش لە 18 یاریدا سەرکەوتوبوو، لە 22 یاریشدا یەکسان بوون.

131 جار خوێندراوەتەوە