لەپێناو منداڵانى ئۆکرانیا رۆژنامەنوسێکى روسى خەڵاتى نۆبڵى فرۆشت

KNN : Kurdish News Network
12:38 - 21/06/2022
هەمەڕەنگ

دیمیتری مۆراتۆڤ، رۆژنامەنوسی روسی ‌و سەرنوسەری رۆژنامەی نۆڤایا گازیتا و براوەی خەڵاتی نۆبڵ بۆ ئاشتی، لە مەزادێکدا لە شاری نیویۆرک، ئەو خەڵاتەی فرۆشت کە ساڵی رابردو پێی بەخشرا بو.

بە گوێرەی ئاژانسەکان مۆراتۆڤ، خەڵاتەکەی بە 103 ملیۆن ‌و 500 هەزار دۆلار فرۆشتوە ‌و رایگەیاندوە کە پارەکەی تەرخان دەکات بۆ ئەو منداڵانەی بەهۆی شەڕی ئۆکرانیاوە ئاوارە بون.

هاوکات، رێکخراوی (هیریتیج ئۆکشن) کە مەزادەکەی رێکخست، رایگەیاند: ئەو کەسەی خەڵاتەکەی کڕیوە، لە رێی تەلەفۆنەوە بەشدار بوە ‌و ناوەکەی ئاشکرا نەکراوە، جەختیشی کردەوە لەوەی، راستەوخۆ پارەی خەڵاتەکە، تەرخان دەکەن بۆ ئەو پرۆژانەی رێکخراوی یونیسێف کە راستەوخۆ دەچنە خزمەتی بواری مرۆیی بەتایبەت بۆ منداڵانی ئاوارەی شەڕی ئۆکرانیا.

 دمیتری موراتوڤ، ساڵی رابردو بە هاوبەشی لەگەڵ ماریا ریسا، رۆژنامەنوسی فیلیپینی، بەهۆی هەوڵەکانیان لەبارەی ئازادیی رۆژنامەگەریی، خەڵاتی نۆبڵیان بۆ ئاشتی پێ بەخشرا.

119 جار خوێندراوەتەوە