وەزارەتی ئەوقاف و کاروباری ئایینی حکومەتی هەرێمی کوردستان بڕیاریدا ماوەی دانانی پرسە تەنها یەک ڕۆژ بێت و جەخت لەوە دەکاتەوە کە بەهیچ شێوەیەک ڕێگەپێدراو نییە لەو ماوەیە زیاتر بێت، بۆ ئەو مەبەستەش لیژنەیەکی پسپۆڕ چەند ڕێنماییەکی نوێ دەردەکات.

ئەمڕۆ یەکشەممە، پشتیوان سادق، وەزیری ئەوقاف و کاروباری ئایینی، بە ئامادەبوونی زەیندەین مەولود، بریکاری وەزارەت، لەگەڵ بەشێک لە کارگێڕانی هۆڵەکانی بۆنە و پرسەکان لە هەولێر کۆبووەوە. لە کۆبوونەوەکەدا جەخت لەسەر پابەندبوونی هەموو لایەک بە ڕێنماییەکانی تایبەت بە پرسە و بۆنە ئایینییەکان کرایەوە لە پێناو خزمەتی گشتی و ڕێکخستنەوەی ئەو بوارە.

وەزیری ئەوقاف ئاماژەی بەوە کرد، پێویستە پابەندییەکی تەواو هەبێت بەوەی کە ڕۆژی پرسە تەنها یەک ڕۆژە و نابێت لەو ماوەیە تێپەڕێت. بڕیاریشە لیژنەیەکی پسپۆڕ بە سەرپەرشتی وەزارەت، چەند خاڵێکی ڕێنمایی نوێ لە بەرژەوەندی گشتی دەربکات، بە مەبەستی ئاسانکاریکردن بۆ کەسوکاری مردوو و کەمکردنەوەی باری گرانی سەرشانیان، کە بڕیارە لە سەرجەم هۆڵەکانی پرسەدا وەک خۆی جێبەجێ بکرێن.