وەزارەتی ناوخۆ هەمواری گرێبەستی ئەلیکترۆنی کڕین و فرۆشتنی ئۆتۆمبێلی بڵاوکردەوە

KNN : Kurdish News Network
07:33 - 10/01/2022
جیهان

وەزارەتی ناوخۆی حکومەتی هەرێم هەمواریی گرێبەستی ئەلیکترۆنیی کڕین و فرۆشتنی ئۆتۆمبێلی لە هەرێمی کوردستان بڵاوکردەوە و بەپێی هەموارەکەش، ماوەی گواستنەوەی خاوەندارێتیی ئۆتۆمبێل لە فرۆشیارەوە بۆ کڕیار بە دوو مانگ دیاریکراوە و هەروەها ئاماژە بە هیچ بڕە پارەیەک نەکراوە لە کاتی ئەنجامدانی گرێبەستی ئەلیکترۆنی.

 

 وەزارەتی ناوخۆی حکومەتی هەرێم بە نووسراوی ژمارە (825) کە ئەمڕۆ دوشەممە 10/1/2022 بڵاوکراوەتەوە سەبارەت بە رێنمایی ژمارە 3ی ساڵی 2021ی تایبەت بەرێکخستنی کاری کۆمپانیاکانی هاوردەکردن و گواستنەوە و فرۆشتنی ئۆتۆمبێل.

 

 لە هەموارە نوێیەکەدا هاتوە "ئەو گرێبەستانەی پێش 2-1-2022 کراون، لە بەڕێوەبەرایەتییەکانی هاتووچۆ کاریان پێدەکرێت و پەسند دەکرێن، هەروەها ئەو ئۆتۆمبێلانەی بەهۆی نەبوونی گرێبەستی ئەلیکترۆنی سزای دواکەوتنیان کەوتووەتە سەر، لەو سزایانەی لە رۆژی 2-1-2022 تاوەکو 15-3-2022 لەسەریان هەیە دەبەخشرێن".

 

 ئاماژە بەوەشکراوە، دەبێت كۆمپانیا و پێشانگه‌كانی ئۆتۆمبێل تا 15ی ئاداری ئەمساڵ خۆیان تۆمار بكه‌ن و ئه‌و كۆمپانیا و پێشانگایانه‌ی ئۆتۆمبێل، کە كێشه‌ی باج یان خاوه‌ندارێتی یان كێشه‌ی گرێبه‌ستیان هه‌یە كۆدیان پێده‌درێت و پێویسته‌ تاوەکو رۆژی 31ی 12ی 2022 ئه‌و كێشانه‌ له‌گه‌ڵ لایه‌نی په‌یوه‌ندیدار له‌ حكومه‌ت چاره‌سه‌ر بكه‌ن".

 

 هەموارە نوێیەکە ئاماژەی بە هیچ بڕە پارەیەک نەکردوە کە لەکاتی کڕین و فرۆشتن وەربگیرێت، ئەوە لەکاتێکدایە لەماوەی رابردودا و دوای ئەوەی رێنمایی تۆماکردنی گرێبەستی ئەلیکترۆنی خرایە بواری جێبەجێکردنەوە، روبەڕوی رەخنەی توند بوەوە و خاوەن پێشانگە و کۆمپانیاکانی کڕین و فرۆشتن ناڕەزایەتیی خۆیان لەو بارەیەوە دەربڕی.

 

1461 جار خوێندراوەتەوە