حکومەتى عێراق دەوامى فەرمانبەران کەمدەکاتەوە

KNN : Kurdish News Network
08:30 - 20/07/2021
عێراق

حکومەتى عێراق رێکارەکانى خۆپارێزى لە ڤایرۆسى کۆرۆنا توندەکاتەوە، لەوچوارچێوەیەشدا دەوامى فەرمانبەران کەمدەکاتەوە.

بەپێى راگەیەنراوێکى نوسینگەى سەرۆک وەزیرانى عێراق، لەمیانى کۆبونەوەى لیژنەى باڵاى سەلامەتى و تەندروستى نیشتیمانى عێراق کە بەسەرۆکایەتى مستەفا کازمى سەرۆک وەزیرانى عێراق بەرێوەچو، کۆمەڵێک بڕیار بۆ توندکردنى رێکارەکانى خۆپارێزى لە ڤایرۆسى کۆرۆنا دراون .

یەکێک لە بڕیارەکان بریتیە لە کەمکردنەوەى دەوامى فەرمانبەران لە دامەزراوەکانى دەوڵەتدا بە رێژەى (50%)، بەڵام بڕیارەکە کارمەندانى دەزگا تەندروستی و ئەمنیەکان و کارمەندانى فەرمانگەکانى کارەبا ناگرێتەوە.

بڕیارەکانى دیکەش تایبەتن بە توندکردن و چاودێرى کردنى رێکارەکانى خۆپارێزى لە شوێنە گشتییەکاندا .

ئەوەش لەکاتێکدایە لە چەند رۆژى رابردوودا ژمارەى توشبوانى کۆرۆنا لە عێراق بەشێوەیەکى بەرچاو بەرزبوەوە.   

1034 جار خوێندراوەتەوە