عەبدوڵا ئۆجەلان ڕایدەگەیەنێت، ئامانجی ئەو بەدیهێنانی ئاشتی و بەسیاسیکردنە کە بە واتای چەکدانان و سیاسەتی دیموکراسی دێت، هاوکات شاندی دەم پارتیش بۆ ئیمڕاڵی ئاماژە بەوە دەکات کە ڕێگای ئاشتی کراوەیە و کاتی خستنەڕووی ئیرادەی سیاسییە.

شاندی ئیمڕاڵیی پارتی یەکسانی و دیموکراسیی گەلان (دەم پارتی)، لە ڕاگەیەندراوێکدا بڵاویکردەوە، ڕۆژی 13ـی ئەیلولی 2026، لە دورگەی ئیمڕاڵی چاویان بە عەبدوڵا ئۆجەلان کەوتووە و لە دیدارەکەدا قۆناغی ئێستای تورکیا، چارەسەری دیموکراسی، گەشەپێدانی ئاشتییەکی سەرتاسەری، ئەو هەنگاوە کردارییانەی بۆ بەرەوپێشبردنی پرۆسەکە پێویستن و پێشهاتەکانی ناوچەکە تاوتوێ کراون.

لە پەیامەکەیدا بۆ ڕایگشتی، عەبدوڵا ئۆجەلان ئاماژەی بەوە کردووە: "پرۆسەی ئاشتی و کۆمەڵگەی دیموکراسی لە قۆناغێکدایە کە پێویست دەکات بەبێ دواکەوتن بەرپرسیارێتییە مێژووییەکان جێبەجێ بکرێن. دوای دەرچوونی یاساکە، جێبەجێکردنی هەنگاوی کرداریی هاوبەش و دەستبەکاربوونی لیژنەکان گرنگییەکی زۆری هەیە". هەروەها دەڵێت: "ئامانجی من بەدیهێنانی ئاشتی و بەسیاسیکردنە؛ ئاشتی بە واتای چەکدانان دێت و بەسیاسیکردنیش بە واتای سیاسەتی دیموکراسی و کۆمەڵگەی دیموکراسی دێت".

ئۆجەلان هۆشداری دەدات کە دەرفەتێکی مێژوویی لەبەردەم تورکیادایە و پێویستە ئیرادەی ئاشتی بەتاڵی پێوە دیار نەبێت، بەڵکو بە ڕێکاری یاسایی و سیاسیی کۆنکرێتی مسۆگەر بکرێت. سەبارەت بە ڕۆژهەڵاتی ناوەڕاست و ڕۆژئاواش جەختی کردووەتەوە کە دەبێت کێشەکان لەسەر بنەمای گفتوگۆ و دانوستان چارەسەر بکرێن بۆ پووچەڵکردنەوەی هەموو ئاژاوە و پشێوییەک.

لە کۆتایی ڕاگەیەندراوەکەدا، شاندی دەم پارتی دووپاتی دەکەنەوە کە نزیکایەتیی سەرەکیی ئۆجەلان بۆ چەسپاندنی ئاشتی و بەهێزکردنی سیاسەتی دیموکراسییە، و داوا دەکەن ئەو ئیرادە و پراکتیکە سیاسییە بخرێتەڕوو کە ئەو ڕێگایە بەرەوپێش دەبات.