دانیمارک لەبارەى پێدانى مافى پەنابەریەوە پرۆژە یاسایەکى پەسەندکرد

KNN : Kurdish News Network
08:38 - 03/06/2021
جیهان

پەرلەمانى دانیمارک پرۆژە یاسیایەک لەدژى داواکارانى مافى پەنابەرى پەسەند دەکات، ئەو هەنگاوەش یەکێتى ئەوروپا نیگەران دەکات.

ئەمرۆ پەرلەمانى دانیمارک بە زۆرینەى دەنگ پرۆژە یاسایەکى پەسەند کرد، کە بەپێى ناوەرۆکەکەى داواکارانى مافى پەنابەرى لەو وڵاتە دیپۆرتى وڵاتێکى دەرەوەى ئەوروپا دەکرێن.

ئەو پرۆژە یاسایە (70) ئەندامى پەرلەمان دەنگیان پێداوە لەبەرامبەریشدا (24) ئەندامى پەرلەمان رەتیان کردوەتەوە، رێکخراوەکانى تایبەت بە پرسى پەنابەرانیش پەسەندکردنى ئەو پرۆژیاسایە بەپێچەوانەى هەوڵەکانى یەکێتى ئەوروپا بۆ ئەنجامدانى چاکسازى لە رێوشوێنەکانى کۆچ و پەنابەرى وەسف دەکەن.

لاى خۆیەوە ئەدلبرێت یانس، وتەبێژى کۆمسیۆنى ئەوروپا رایگەیاند، ئەو بابەتە پرسیارى جەوهەرى لەبارەى رێوشوێنەکانى پەنابەرى و پاراستنى داواکارانى مافى پەنابەرى دەوروژێنێت.

بە بڕواى وتەبێژى کۆمسیۆنى ئەوروپا ئەو رێوشوێنەىدانیمارک لە بەرامبەر داواکارانى مافى پەنابەرى دەیگرێتەبەر پێچەوانەى بنەماکانى یەکێتى ئەوروپا و ئەو پێشنیارانەیە کە بۆ رێککەوتنیکى نوێ لەبارەى دۆسیەى کۆچ و پەنابەریەوە پێشکەش کراون.

دانیمارک بەوە ناسراوە لە ماوەى دەیەى رابردوودا سیاسەتێکى توندى لە بەرامبەر کۆچبەران گرتوەتە بەر، ئەوەش بە ئامانجى وەرنەگرتنى پەنابەر و سنوردارکردنى وەرگرتنى پەنابەران تەنها لە چوارچێوەی سیستمى دابەشکردنى پەنابەران کە نەتەوە یەکگرتوەکان سەرپەرشتى دەکات.

549 جار خوێندراوەتەوە