پۆلیسى راپەڕین رایدەگەیەنێت؛ لە شەڕێکدا لە نێوان دو دراوسێ لە ناحیەى سەنگەسەر شەش کەس برینداربون و برینى دوانیان سەختە.

لە راگەیەنراوێکدا، پۆلیسى راپەڕین رایگەیاند: کاتژمێر (6:00 )ى ئێوارەی ئەمڕۆ لە ناحیەی سەنگەسەرى سەر بە قەزای پشدەر شەڕێک لەنێوان دوو دراوسێ رویداوە و بەو هۆیەشەوە شەش برینداری لێکەوتۆتەوە.

دەشڵێت: لە لایەکیان باوکێک و دو کوڕی و کچێکی بریندارن و باوک و کچەکەش بەهۆی سەختی برینەکانیانەوە بەڕێکران بۆ رانیە.

ئاشکراشى کردوە، دواى گەیشتنی بریندارەکان دەرکەوت کە شوێنەواری چەقۆ بەسەر جەستەی چوار بریندارەکەوە هەیە و سەرجەمیان ئەندامی یەک خێزانن.

پۆلسى راپەڕین ئاماژەى بەوەشکردوە، دوای روداوەکە دەستبەجێ هێزەکانی پۆلیس و ئاسایش گەیشتونەتە شوێنەکە و دەستیان بە لێکۆڵینەوە لە روداوەکە کردوە و بارودۆخەکەش لە ژێر کۆنتڕۆڵی هێزەکانیان دایە و دو کەسیش لەلایەن بنکەی پۆلیسی سەنگەسەر دەستبەسەرن کراون.

هەرچەندە پۆلیس لە راگەیەنراوەکەیدا ئاماژەى بە برینداربونى شەش کەس کردوە، بەڵام تەنها بریندارى یەک لایەنى شەڕەکەى خستۆتەرو کە چوار کەسن و ئاماژەى بە دو بریندارەکەى دیکە نەکردوە.