لە نوێترین توێژینەوەدا کە لەبارەى ڤایرۆسى کۆرۆنا و ئەو کەسانە ئەنجامدراوە کە هەڵگرى ڤایرۆکەسەن، دەرکەوتوە کە (کۆکە و هەناسە توندی) لە نیشانە باوەکانى توشبون بە کۆرۆنا نییە.

د.بيلال عومەر پزیشکى پسپۆڕى دەرمان، رایدەگەیەنێت: توێژینەوەیەکى نوێى جیهانى ئاشکراى کردوە، هەرکەسێک هەستی تام و بۆنی نەما ئەوە بە دڵنیاییەوە توشی ڤایرۆسی کۆرۆنا بووە، بەپێى توێژینەوەکە دەرکەوتووە لە (78%)ى ئەو کەسانەی کە هەستی تام و بۆنیان نەماوە ئەنجامی پشکنینەکانی کۆرۆنایان پۆزەتیڤ بووە.

هاوکات ئاماژەبەوەکراوە، نیشانە باوەکانی کۆرۆنا، کۆکە و پژمە و هەناسە توندی نییە، بەڵکو نەمانی هەستی تام و بۆنە.

ئەو پزیشکە دەڵێت: رەنگە زۆربەی ئەو کەسانەی تووشی کۆرۆنا دەبن هیچ نیشانەیەکی قورس و دیاریان نەبێت، بەڵام کە هەستیان کرد تام و بۆنیان لاواز دەبێت یاخود نامێنێت، با راستەخۆ خۆیان کەرەنتین بکەن، چونکە بە دڵنیاییەوە تووشی کۆرۆنا بوون، بۆیە لە کاتی ئێستادا نەمانی هەستی تام و بۆن بە نیشانەی یەکەم و سەرەکی تووشبوون بە کۆرۆنا دادەنرێت.