وێنە و ڤیدیۆ...زانیاری نوێ لەبارەی مۆبایلە نوێكەی هواوی

10:51 - 25/08/2020
زانستی

ماوەی چەند ساڵێكە مۆبایلەكانی هواوی كڕیارێكی زۆریان هەیە، كۆمپانیای بەرهەمهێنەریش ساڵانە مۆبایلی نوێ بە كۆمەڵێك تایبەتمەندی و سەردەمیانە و جیاواز دەخاتە بازاڕاوە.

نوێترین بەرهەمی هواوی مۆبایلێكە بە ناوی (Huawei Mаte 40) كە بڕیارە بەم زووانە ئامادەبێت بۆ فرۆشتن، كەسانێكی زۆریش لەهەوڵی زانینی شێوە و تایبەتمەندییەكانی مۆبایلە نوێكەن.

بەپێی هەواڵێكی پەیجی (RODENT950) كە یەكێكە لە بەناوبانگترین پەیجەكانی تایبەت بە تەكنەلۆژیا لە تۆڕی كۆمەڵایەتی تویتەر، مۆبایلە نوێكە كامێرا بنەڕەتییەكەی لە پشتەوەیە و دەكەوێتە ناو چوارچێوەیەكی بازنەییەوە و چەند وێنەیەكی ئەو بەرهەمە نوێیەشی بڵاوكردۆتەوە.

كامێراكە چوار هاوێنەى هەیە كە سەرجەمیان لەو چوارچێوە بازنەییەدان، دوانیان لە لاكانی ڕاست و چەپدان و دوو گڵۆپی فلاش و ڕووناككەرەوە لە ناوەڕاستەكەیدایە، هاوێنەی گەورە و سەرەكیش لە بەشی سەرەوەیە، هەروەها هاوێنەیەکی بچوكیش لە بەشی خوارەوەی لای چەپدایە.

پەیجەكە ئاماژە بەوەش كردووە، مایكرۆفۆنی كامێراكانیش بەهەمان شێوە لەناو ئەو چوارچێوە بازنەییەدا دانراوە، بەڵام دوگمەی دەنگ و كوژاندنەوە دەكەوێتە قەراغی لای ڕاستی مۆبایلەكە.

پێشبینی دەكرێت هاوێنەكانی كامێراكە لە جۆری (Leica) بێت و 500 مێگاپێكسڵە، هەروەها مۆبایلەكە بە سیستمی ئەندرۆید 11 كاردەكات و چەندین تایبەتمەندی دیكەی نوێ و سەردەمیانەی تێدایە.



472 جار خوێندراوەتەوە