هەریەکە لە سەرۆکی پەرلەمانەکانی ئەڵمانیا و فەڕەنسا داوا دەکەن بە زوترین کات سنورەکانی نێوان وڵاتەکانی ئەوروپا بکرێنەوە و ژیان ئاسایی بکرێتەوە.

لەبەیانامەیەکی هاوبەشدا سەرۆکی هەردوو پەرلەمانی ئەڵمانیا و فەڕەنسا ئاماژەیان بەوەکردوە، هەردوو وڵات کاردەکەن بۆ ئەوەی بە زوترین کات ئازادی جوڵەکردن لە نێوان سنورەکانی شنگن دەستپێ بکاتەوە.

فەڕەنسا لە پلەی حەوتەم و ئەڵمانیاش لە پلەی هەشتەمی ئەو وڵاتانەدان کە زۆرترین توشبووی کۆرۆنایان هەیە و لە فەرەنسا زیاتر لە ١٨٢ هەزار و لە ئەڵمانیاش زیاتر لە ١٨٠ هەزار کەس توشبوون.

ئەوە لەکاتێکدایە بەهۆی بڵاوبونەوەی ڤایرۆسی کۆرۆناوە تەواوی گەشت و هاتوچۆی نێوان وڵاتەکانی ئەوروپا و بەشێکی زۆری جیهان وەستاوە،بەڵام هەندێک وڵات دەستیان کردۆتەوە بەرێکارەکانی ئاسایکردنەوەی ژیان.