بەپێی توێژینەوەیەکى چینى کە لە ڕۆژنامەییەکى زانستیدا بڵاوکراوەتەوە، ئەو تازە پێگەیشتووانەی زیاتر دەخەون توانای ڕوبەڕوبونەوەی گۆڕانکاری و کێشە و ئاستەنگەکانیان زیاترە، بۆیە پێویست ناکات لەبارەی زۆرخەوتنی ئەو گەنجانەوە دایک و باوکەکان نیگەران بن.

ماڵپەری سکای نیوزی بەریتانی بڵاویکردوەتەوە، لێکۆڵەرەکانی بوار پزیشکی و دەرونناسی لە چین توێژینەوەیەکیان لەسەر ئەو گەنجە تازە پێگەیشتوانە ئەنجامداوە کە زۆر دەخەون و زیاتر لە کاتژمێرە ئاساییەکان لە جێگای خەویان دەمێننەوە، بەپێى توێژینەوەکە ئەو گەنجانە زیاتر توانای خۆڕاگری و ڕوبەڕوبونەوەی ئاستەنگ و گۆرانگارییەکانیان هەیە.

لەبارەی وردەکاری توێژینەوەکەشەوە ماڵپەرەکە رایگەیاندوە، ئەو توێژینەوەیە لەسەر (840) گەنجی تازە پێگەیشتوو ئەنجامدراوە، دەرکەوتووە ئەوانەی زۆرتر دەخەون و زووش خەویان لێدەکەوێت، کەسایەتییەکی نەرم و نیانتریان هەیە و دەتوانن بەسەر کێشەکاندا سەربکەون و لەگەڵ بارودۆخە جیاواز و جۆراجۆرەکاندا هەڵبکەن.

پێشتر چەند توێژینەوەیەکی زانستی دەریخستبوو، شێواز و کوالێتی خەوتن کاریگەری لەسەر هێمن بوون و نەرم و نیانی کەسەکان هەیە، بەجۆرێک ئەگەر کەسەکە خەوی باشبێت و بەپێی پێویستی جەستەی و ماندوبوونی ڕۆژانەی بخەوێت، ئەوا کەمتر توڕەیی و هەڵچونی لێدەبینرێت.

بەهۆی کاریگەری باشی خەوتنیش لەسەر چالاکبوونی جەستە و دەرونی مرۆڤەکانیشەوەیە لەزۆربەی ناوەندەکانی خوێندن و فێرکردن لە جیهاندا، بەیانیان وەک باشترین کات بۆ فێربوون دانراوە.