ڕێواس یەكێكە لە بەرهەمە بەهارییە بەتامەكان، بەتایبەت لەناوچە كوێستانەكانی هەرێمی كوردستان و چەند وڵاتێكی دیكە دەڕوێت، زۆر كەسیش حەز بەخواردنی دەكەن.

 لە وڵاتانی جیهان چەندین توێژینەوە لەسەر سودەكانی ڕێواس ئەنجامدراوە، لە وڵاتی چین لە كۆنەوە وەك دەرمان و چارەسەری پزیشكی بۆ چەند نەخۆشی و كێشەیەكی تەندروستی بەكارهاتووە.

ئەو بەرهەمە لەڕووی زانستییەوە لە تیرەی حەوت گرێكانە كە بە(Polygonaceae) ناسراون، چەند جۆرێكی ڕووەكی دیكەشیان هەیە.

ڕێواس دەوڵەمەندە بە ڤیتامینەكانی ئەی و بی و سی، هەروەها بڕێكی زۆر لە ماددە ڕێشاڵییەكان لەپێكهاتەكەیدایە، ئەمە جگە لە بونی پۆتاسیۆم و سۆدیۆم و كالسیۆم، ئەوانەش وادەكەن ئەگەری توشبوون بە چەندین كێشەی تەندروستی كەمبێتەوە.

ئەو بەرهەمەی بەهار سودی بۆ كۆئەندامی هەرس هەیە، بەجۆرێك ئازاری گەدە كەمدەكاتەوە و كرمی ناو گەدە و ڕیخۆڵە لەناودەبات دەردانی ڕژێنەكانی ڕێكدەخات و ئەندامەكانی بەهێز دەكات، هەروەها لەش لە ژەهر و ماددە زیان بەخشەكان پاكدەكاتەوە.

ئەو كالسیۆمەی لەپێكهاتەكەیدایە بە بڕێكی زۆرە، ئەوەش دەبێتە هۆی بەهێزبونی ئێسك و ئازاریان كەمدەكاتەوە، ئەمە جگە لەوەی سودی بۆ ماسولەكەكان هەیە و چەوری خوێن كەمدەكاتەوە و فشاریش دادەبەزێنێت.

ئەو توێژینەوانەی لەسەر ڕێواس ئەنجامدراوە دەریخستووە، ڕێگرە لە زوو دەركەوتنی نیشانەكانی پیری و پەڵە و زیپكەی سەر ڕوخسار دەشارێتەوە و پێست لە جوانتر و درەوشاوەنتر دەردەخات.

سودێكی دیكەی ئەو بەرهەمە بۆ جگەرە بەتایبەت بۆ كەمكردنەوەی هەوكردن، هەروەها دژی چالاكبونی خانە شێرچەنجەییەكان و شەكری خوێن ڕێكدەخات و ڕێگری دەكات لە ئەگەری توشبوون بە نەخۆشی و كێشەكانی كۆئەندامی هەناسەدان لەوانە هەناسە توندی.